آئی سی سی کا فیصلہ: بھارتی کپتان سوریا کمار یادیو قصوروار قرار

انٹرنیشنل کرکٹ کونسل (آئی سی سی) نے 14 ستمبر کو پاک بھارت میچ کے بعد پریزنٹیشن میں دیے گئے متنازع بیان پر بھارتی کپتان سوریا کمار یادیو کو قصوروار قرار دے دیا ہے۔

کرکٹ سے متعلق ویب سائٹس کے مطابق، آئی سی سی نے اس بیان کو ضابطہ اخلاق کی خلاف ورزی قرار دیا ہے۔

ذرائع کا کہنا ہے کہ بھارتی کپتان گزشتہ روز پاکستانی شکایت کے بعد آئی سی سی میچ ریفری کے سامنے پیش ہوئے تھے، جہاں آج میچ ریفری رچی رچرڈسن نے اپنا فیصلہ سنایا، اور سوریا کمار پر سیاسی بیان دینے کا الزام درست ثابت ہوا۔

ذرائع کے مطابق، اس فیصلے کی تفصیلی رپورٹ جلد آئی سی سی کی جانب سے جاری کی جائے گی، جبکہ سوریا کمار یادیو پر میچ فیس کا 30 فیصد جرمانہ عائد کیے جانے کا امکان ہے۔

یاد رہے کہ 14 ستمبر کو ایشیا کپ کے گروپ اسٹیج میں پاکستان کے خلاف فتح کے بعد سوریا کمار یادیو نے میچ پریزنٹیشن میں پہلگام واقعے کا ذکر کرتے ہوئے ایک متنازع سیاسی بیان دیا تھا، جس پر پاکستان کرکٹ بورڈ (پی سی بی) نے فوری طور پر آئی سی سی کو باضابطہ شکایت درج کروائی تھی۔

پی سی بی نے بھارتی کپتان کے خلاف کارروائی کا مطالبہ کرتے ہوئے کہا تھا کہ کھیل کو سیاست سے دور رکھا جانا چاہیے۔

ذرائع کے مطابق، آئی سی سی نے گزشتہ روز بھی سوریا کمار یادیو کو ہیرو بننے کی کوشش میں سیاسی بیان بازی پر تنبیہ کی تھی، جسے ضابطہ اخلاق کی خلاف ورزی تصور کیا گیا۔