ایشیا کپ فائنل : دونوں ممالک کے مابین تناؤبرقرار، ٹرافی کے ساتھ فوٹو شوٹ کا معاملہ کھٹائی میں پڑ گیا

دبئی: ایشیا کپ کے فائنل ٹاکرے میں بھی پاکستان اور بھارت کے مابین تناؤ کی صورتحال برقرا رہے جس کے بعد ٹرافی کے دونوں کپتانوں کے فوٹو شوٹ کا معاملہ بھی کھٹائی میں پڑ گیا ہے۔

تفصیلات کے مطابق اس بڑے مقابلے سے قبل روایتی ماحول سے ہٹ کر کچھ غیر معمولی صورتحال دیکھنے کو مل رہی ہے، اس بار فائنل سے پہلے دونوں کپتانوں کا ٹرافی کے ساتھ روایتی فوٹو شوٹ نہیں ہورہا۔

اس حوالے سے ایشیا کپ انتظامیہ نے تصدیق کی ہے کہ آج یعنی ہفتے کے روز کوئی فوٹو سیشن نہیں ہوگا اور اس حوالے سے حتمی فیصلہ اتوار کو فائنل سے قبل کیا جائے گا۔

خیال رہے کہ اس سے قبل گروپ میچ میں بھارتی ٹیم نے ایشیا کپ کے دوران پاکستانی کھلاڑیوں سے مصافحہ کرنے سے گریز کیا اور اسی رویے کے فائنل میں بھی دہرائے جانے کا امکان ہےایسی صورتحال دکھائی دے رہی ہے کہ ممکن ہے کہ ٹرافی کے ساتھ دونوں کپتان تصویریں نہ بنوائیں۔

دوسری جانب قومی ٹیم کے کپتان آج رات پاکستانی وقت کے مطابق سات بجے پریس کانفرنس کریں گے۔

خیال رہے پاکستانی ٹیم اپنے تیسرے اور بھارتی ٹیم نویں ٹائٹل کے لیے کل میدان میں اترے گی۔ بھارت نے گروپ اور سپر فور مرحلے میں پاکستان کو شکست دی تھی۔

کرکٹ کے شائقین اس ہائی وولٹیج مقابلے کا بے صبری سے انتظار کر رہے ہیں تاہم میدان سے باہر کشیدگی نے ماحول کو مزید سنجیدہ بنا دیا ہے۔ بھارت میچ جیت کر ہیٹ ٹرک کرنا چاہتا ہے تو پاکستان میچ جیت کر بھارتی فتح کا تسلسل توڑنا چاہتا ہے۔