انتہا پسندی اور عدم برداشت پاکستان کی سیاحت کے فروغ میں بڑی رکاوٹ ہیں،صدر مملکت کا پیغام

اسلام آباد:صدرمملکت آصف زرداری نے کہا ہے کہ انتہا پسندی اور عدم برداشت پاکستان کی سیاحت کے فروغ میں بڑی رکاوٹ ہیں۔

تفصیلات کے مطابق لمی یومِ سیاحت 2025 کے موقع پر خصوصی پیغام میں صدر آصف علی زرداری نے کہا کہ پاکستان میں سیاحت پائیدار ترقی کا ذریعہ بن سکتی ہے۔ ان کا کہنا تھا کہ ملک میں موجود قدرتی حسن، ثقافتی ورثہ اور مہمان نوازی عالمی سیاحوں کے لیے کشش رکھتی ہے، مگر ماحولیاتی تبدیلی اور انتہاپسندی جیسے چیلنجز اس راہ میں بڑی رکاوٹ ہیں۔

اپنے بیان میںانہوں نےمزید کہا کہ سیاحت اور پائیدار تبدیلی عالمی یوم سیاحت 2025 کا موضوع قرار دیا گیا ہے، ماحولیاتی تبدیلی پاکستان کی سیاحتی ترقی کے لیے بڑا چیلنج ہے۔

صدر آصف علی زرداری نے کہا کہ سیاحت سے نہ صرف مقامی معیشت کو فروغ مل سکتا ہے بلکہ خواتین اور نوجوانوں کو بااختیار بنانے کے مواقع بھی پیدا کیے جا سکتے ہیں۔ حکومتِ پاکستان سیاحت کو اقوام متحدہ کے ترقیاتی اہداف (SDGS) سے ہم آہنگ کرنے کے لیے پرعزم ہے۔

بیان میں صدر زرداری نے کہا کہ گرین سرٹیفکیشن، کمیونٹی بیسڈ اور ماحولیاتی سیاحت پر توجہ دینے کی ضرورت ہے، صدر مملکت نے کہا کہ سیاحت، امن و ہم آہنگی کے فروغ اور ثقافتی ورثے کے تحفظ کا مؤثر ذریعہ ہے۔

اپنے بیان میں صدر مملکت نے مزید کہا کہ پاکستان قدرتی حسن، ورثے اور مہمان نوازی کا حامل ملک ہے، سیاحت کے فروغ میں نجی شعبہ، سول سوسائٹی اور نوجوان کلیدی کردار ادا کر سکتے ہیں، پاکستان کو عالمی سیاحتی مرکز بنانے کے لیے سب کو مل کر کام کرنا ہو گا۔