پنجاب کے سیلاب پر سیاست افسوسناک ہے، مریم نواز کا چکوال میں خطاب

چکوال: وزیراعلیٰ پنجاب مریم نواز نے کہا ہے کہ پنجاب میں آنے والے بدترین سیلاب پر دیگر صوبوں نے سیاسی پوائنٹ اسکورنگ کی۔

ہونہار اسکالرشپ اور لیپ ٹاپ تقسیم کی تقریب سے خطاب کرتے ہوئے مریم نواز کا کہنا تھا کہ پنجاب کو تین دریاؤں میں آنے والے شدید سیلاب کا سامنا رہا، جس نے کئی علاقوں میں تباہی پھیلائی، لیکن بدقسمتی سے کچھ عناصر نے اس سانحے پر سیاست کی۔

انہوں نے کہا کہ پنجاب حکومت کے تمام وزرا سیلاب متاثرین کے ساتھ میدان میں موجود رہے، اور ہر سطح پر مدد فراہم کی۔

وزیراعلیٰ پنجاب نے زور دیا کہ حکومتی عہدیداروں کا کام صرف اے سی والے کمروں یا سرکاری گاڑیوں میں گھومنا نہیں، بلکہ عوام کے درمیان موجود ہونا ہے۔ اُن کا کہنا تھا کہ جنہیں بنیادی سہولیات جیسے سڑکیں، لیپ ٹاپ اور مفت ادویات میسر نہیں، وہ حکمرانوں سے ضرور سوال کریں۔