کراچی میں وقفے وقفے سے موسلا دھار بارش، موسم خوشگوار

کراچی: شہر قائد کے مختلف علاقوں میں کہیں ہلکی تو کہیں تیز اور موسلا دھار بارش کا سلسلہ وقفے وقفے سے جاری ہے۔

گلستان جوہر، ملیر، ماڈل کالونی، آئی آئی چندریگر روڈ اور ملحقہ علاقوں میں شدید بارش ہو رہی ہے، جس کے باعث نشیبی علاقوں میں پانی جمع ہونے کی اطلاعات موصول ہو رہی ہیں۔

محکمہ موسمیات کے مطابق، ہوا کا کم دباؤ اس وقت بھارتی ریاست گجرات پر موجود ہے، جسے بحیرہ عرب سے نمی حاصل ہو رہی ہے، اور یہ سسٹم تیزی سے مضبوط ہو رہا ہے۔

موسم کا یہ سسٹم شدت اختیار کرکے ممکنہ طور پر ڈپریشن میں تبدیل ہو سکتا ہے اور کل تک شمالی بحیرہ عرب میں داخل ہونے کا امکان ہے۔

اس سے قبل، آج دوپہر کے وقت کراچی کے علاقوں گرومندر، صدر، اولڈ سٹی ایریا، گارڈن، آئی آئی چندریگر روڈ، لیاقت آباد، ایف بی ایریا، ایف سی ایریا اور پرانی سبزی منڈی میں بھی بارش ہوئی، جس سے موسم خوشگوار ہو گیا اور گرمی کا زور ٹوٹ گیا۔