ن لیگ اور پیپلز پارٹی میں کشیدگی ختم کرنے پر اتفاق

حکومتی اتحادی جماعتوں مسلم لیگ (ن) اور پاکستان پیپلز پارٹی کے درمیان حالیہ سیاسی کشیدگی کے بعد پیدا ہونے والی غلط فہمیوں کو بات چیت کے ذریعے حل کرنے پر اتفاق کیا گیا ہے۔ ذرائع کے مطابق یہ پیش رفت قومی اسمبلی کے اسپیکر ایاز صادق کے چیمبر میں ہونے والی ایک اہم ملاقات کے دوران ہوئی، جس میں دونوں جماعتوں کے سینئر رہنماؤں نے شرکت کی۔ ملاقات میں مسلم لیگ ن کی جانب سے نائب وزیراعظم اسحاق ڈار، سینیٹر رانا ثنااللہ اور وفاقی وزیر قانون اعظم نذیر تارڑ شامل تھے، جبکہ پیپلز پارٹی کی نمائندگی نوید قمر اور اعجاز جاکھرانی نے کی۔

ملاقات میں وزیراعلیٰ پنجاب مریم نواز کے حالیہ بیانات سے جنم لینے والی کشیدگی کا تفصیل سے جائزہ لیا گیا۔ پیپلز پارٹی کے رہنما نوید قمر نے اسحاق ڈار کے ذریعے مریم نواز کو یہ پیغام دیا کہ وہ اپنے بیانات میں احتیاط برتیں، کیونکہ سخت زبان کے جواب میں سخت ردعمل آ سکتا ہے۔ رانا ثنااللہ سے گفتگو کرتے ہوئے بھی پیپلز پارٹی کے رہنماؤں نے واضح کیا کہ پارٹی سخت بیانیے کا جواب دینے کی صلاحیت رکھتی ہے، تاہم افہام و تفہیم اور سنجیدگی کے ساتھ معاملات کو آگے بڑھانا سب کے مفاد میں ہے۔

ملاقات خوشگوار ماحول میں ہوئی اور دونوں جماعتوں نے اس بات پر مکمل اتفاق کیا کہ اتحادی حکومت کے استحکام کے لیے اختلافات کو مذاکرات اور مشاورت کے ذریعے ہی حل کیا جانا چاہیے۔