اسلام آباد پولیس نے نیشنل پریس کلب پردھاوا بول دیا،کیفے ٹیریا میں توڑ پھوڑ

اسلام آباد: وفاقی دارالحکومت اسلام آباد نے نیشنل پریس کلب پر دھاوا بولتے ہوئے کیفے ٹیریامیں توڑ پھوڑ کی اور پریس کلب کے ملازمین کو گرفتار کر کے ساتھ لے گئی۔

تفصیلات کے مطابق مظاہرین پریس کلب کے باہر احتجاج کر رہے تھے،کہ پولیس نے پریس کلب میں داخل ہو کر صحافیوں کو مظاہرین سمجھ کر ان پر تشدد اورلاٹھی چارج کرنا شروع کر دیا۔

سیکریٹری جنرل پی یو ایف جے ارشد انصاری نے اسلام آباد پریس کلب میں صحافیوں پر تشدد کی شدید مذمت کی،ارشد انصاری نے وزیر اعظم سے اس واقعے پر فوری طور پر ایکشن لینے کا مطالبہ کیا اور کہا کہ میں اس واقعے کو حملہ تصور کرتا ہوں۔

انہوں نے کہا کہ شہر اقتدار میں صحافیوں پر تشدد کھلم کھلا غنڈہ گردی ہے، حملے میں ملوث اہلکاروں کو مقدمہ درج کرکے گرفتار کیا جائے۔، یہ واقعہ دیکھ کر ایسا لگا کہ یہ پریس کلب نہیں کوئی پولیس لائن ہے۔

دوسری جانب وفاقی وزیر اطلاعا ت عطا تارڑ نے نیشنل پریس کلب میں پیش آنے والے واقعے پر افسوس کا اظہار کرتے ہوئے کہا کہ پریس کلب میرے گھر کی طرح ہے اس واقعے کی صاف اور شفاف تحقیق کی جائے گی۔