حکومت نے چینی کی مزید درآمد پر پابندی لگا دی

حکومت نے ملک میں چینی کے وافر ذخائر کو مدنظر رکھتے ہوئے مزید درآمدات روکنے کا فیصلہ کیا ہے۔

سرکاری ذرائع کے مطابق وزارتِ قومی غذائی تحفظ میں شوگر اسٹاک کا تفصیلی جائزہ لیا گیا، جس کے بعد فیصلہ کیا گیا کہ ٹریڈنگ کارپوریشن آف پاکستان (TCP) اب چینی کی مزید درآمد نہیں کرے گی۔

حکام کا کہنا ہے کہ ملک میں چینی کی دستیاب مقدار تسلی بخش ہے، اس لیے درآمد کی فوری ضرورت باقی نہیں رہی۔ اس فیصلے کے تحت چینی کی درآمد صرف اُن معاہدوں تک محدود رہے گی جو پہلے ہی کیے جا چکے ہیں۔

اب تک 3 لاکھ میٹرک ٹن چینی درآمد کرنے کے معاہدے ہو چکے ہیں، اور ٹی سی پی کو ہدایت دی گئی ہے کہ ان کے علاوہ کسی بھی نئی درآمد سے گریز کیا جائے۔

یاد رہے کہ اس سے قبل حکومت نے 5 لاکھ میٹرک ٹن چینی درآمد کرنے کا فیصلہ کیا تھا، جس میں اب رد و بدل کر کے درآمدی حجم کو کم کر دیا گیا ہے۔