پی اینڈ جی کی ذیلی کمپنی کا پاکستان سے انخلا، اسٹاک مارکیٹ سے ڈی لسٹنگ پر غور

معروف ملٹی نیشنل ادارے پروکٹر اینڈ گیمبل (P&G) کی ایک ذیلی کمپنی نے پاکستان میں اپنا کاروبار مرحلہ وار سمیٹنے کا اعلان کر دیا ہے اور پاکستان اسٹاک ایکسچینج سے ڈی لسٹنگ کے عمل پر غور شروع کر دیا ہے۔

کمپنی نے پاکستان اسٹاک ایکسچینج (PSX) اور سکیورٹیز اینڈ ایکسچینج کمیشن آف پاکستان (SECP) کو ایک خط کے ذریعے مطلع کیا ہے کہ وہ عالمی سطح پر اپنی کاروباری حکمت عملی میں تبدیلی کے تحت پاکستان میں تجارتی سرگرمیاں محدود کر رہی ہے۔

خط کے مطابق یہ فیصلہ P&G کی عالمی ری اسٹرکچرنگ پالیسی کا حصہ ہے، جس کا مقصد کاروباری پورٹ فولیو کی تنظیم نو، سپلائی چین کو مؤثر بنانا اور ڈیجیٹل ٹیکنالوجی کو مزید فروغ دینا ہے۔

اس فیصلے پر عمل درآمد کے لیے کمپنی کا بورڈ آف ڈائریکٹرز جلد ایک اجلاس طلب کرے گا، جس میں تمام قانونی تقاضوں کو مدنظر رکھتے ہوئے PSX سے ڈی لسٹنگ کے مراحل پر غور کیا جائے گا۔

ادھر کمپنی نے ایک علیحدہ بیان میں واضح کیا ہے کہ اگرچہ وہ پاکستان میں مینوفیکچرنگ اور براہِ راست تجارتی سرگرمیاں بند کر رہی ہے، تاہم تھرڈ پارٹی ڈسٹری بیوٹرز کے ذریعے صارفین کو اپنی مصنوعات کی فراہمی جاری رکھے گی۔