چرچ آف انگلینڈ کی تاریخ میں پہلی بار خاتون آرچ بشپ مقرر

چرچ آف انگلینڈ نے اپنی 1400 سالہ تاریخ میں پہلی مرتبہ ایک خاتون کو آرچ بشپ کے عہدے پر فائز کر دیا ہے۔

رائٹرز کے مطابق، ڈیم سارہ مولالی کو چرچ آف انگلینڈ کی پہلی خاتون آرچ بشپ کے طور پر منتخب کیا گیا ہے، جو آرچ بشپ آف کینٹربری کے طور پر 106 ویں مذہبی پیشوا ہوں گی۔

یہ پیش رفت 2014 میں چرچ آف انگلینڈ کی جانب سے خواتین کو بشپ بنانے کی اجازت دیے جانے کے بعد ممکن ہوئی ہے، کیونکہ اس سے قبل خواتین اس اعلیٰ مذہبی منصب کے لیے اہل نہیں سمجھی جاتی تھیں۔

63 سالہ سارہ مولالی اس سے قبل لندن کی بشپ کے طور پر سات سال خدمات انجام دے چکی ہیں، جب کہ وہ ایک وقت میں انگلینڈ کی چیف نرسنگ آفیسر بھی رہی ہیں۔

ان کی مذہبی خدمات کا آغاز 2002 میں ہوا جب انہوں نے باقاعدہ طور پر پادری بننے کا فیصلہ کیا۔ وہ برطانوی ایوان بالا (House of Lords) کی بھی رکن رہ چکی ہیں۔