مریم نواز کا پیپلز پارٹی کو دو ٹوک جواب: پنجاب پر تنقید پر معافی نہیں مانگوں گی

وزیراعلیٰ پنجاب مریم نواز نے پیپلز پارٹی کے معافی کے مطالبے کو سختی سے مسترد کرتے ہوئے واضح کیا ہے کہ وہ ایسی کسی بھی تنقید پر خاموش نہیں رہیں گی جس سے پنجاب کے عوام کی عزت نفس متاثر ہو۔

لاہور میں الیکٹرک بس منصوبے کی افتتاحی تقریب سے خطاب کرتے ہوئے مریم نواز کا کہنا تھا،"میں کیوں معافی مانگوں؟ معافی تو اُس ترجمان کو مانگنی چاہیے جس نے آفت کے وقت پنجاب پر تنقید کی۔ مریم نواز شریف کبھی معافی نہیں مانگے گی۔"

انہوں نے کہا کہ پنجاب میں 26 اضلاع حالیہ سیلاب سے متاثر ہوئے، 25 لاکھ افراد کو محفوظ مقامات پر منتقل کیا گیا، اور سیلاب متاثرین کو مہمانوں کی طرح سہولیات فراہم کی گئیں۔

مریم نواز نے کہا کہ جب پنجاب کو قدرتی آفت نے گھیر رکھا تھا، تب دوسرے صوبوں سے تنقیدی بیانات آئے۔"ہم نے خیبرپختونخوا میں آفت پر تعاون کی پیشکش کی، علی امین گنڈاپور کو فون بھی کیا، باوجود اس کے کہ وہ میرے خلاف بیانات دیتے رہے۔ لیکن پنجاب پر جب تباہی آئی تو مذاق اڑایا گیا۔"

انہوں نے مزید کہا کہ اگر وہ پنجاب کی بات نہیں کریں گی تو کون کرے گا؟"میں خاموش اس لیے رہی کیونکہ متاثرین کو ریلیف دینا اولین ترجیح تھی، مگر اب جواب دینا پڑے گا۔"

وزیراعلیٰ نے یہ بھی کہا کہ آئندہ کوئی پنجاب کے خلاف بولے گا تو اسے جواب ضرور دیا جائے گا۔