آزاد کشمیر میں مذاکرات کی کامیابی نے بھارت کے عزائم ناکام بنا دیے

وفاقی وزیر برائے امور کشمیر اور حکومتی مذاکراتی کمیٹی کے رکن امیر مقام نے کہا ہے کہ آزاد کشمیر میں جوائنٹ ایکشن کمیٹی سے کامیاب مذاکرات نے بھارت کے مذموم مقاصد کو خاک میں ملا دیا ہے۔

اسلام آباد واپسی پر میڈیا سے گفتگو کرتے ہوئے امیر مقام کا کہنا تھا کہ بھارت کی کشمیر میں خونریزی کی خواہش کبھی پوری نہیں ہو سکتی۔ آزاد کشمیر میں تمام معاملات خوش اسلوبی سے طے پا چکے ہیں۔

انہوں نے وزیراعظم شہباز شریف کا شکریہ ادا کرتے ہوئے کہا کہ مقبوضہ کشمیر کے عوام سے ہمارا رشتہ ہمیشہ قائم رہے گا، اور پاکستان ان کے حقِ خودارادیت کی حمایت جاری رکھے گا۔ آزاد کشمیر میں حالیہ واقعات افسوسناک تھے، مگر اب صورت حال بہتری کی جانب گامزن ہے۔

وفاقی وزیر احسن اقبال نے کہا کہ آزاد کشمیر میں معمولاتِ زندگی بحال ہو چکے ہیں، اور مذاکرات کے دوران پاکستان اور آزاد کشمیر کے مفادات کو مدنظر رکھا گیا۔ ان کا کہنا تھا کہ محدود وسائل کے باوجود مسائل حل کرنے کی پوزیشن میں ہیں، اور یہ مذاکرات دراصل جمہوریت اور عوام کی کامیابی ہیں۔

احسن اقبال نے مزید کہا کہ انتظامی کمزوریوں کو دور کرنے کی ضرورت ہے، اور وفاقی حکومت اپنے تمام وعدے پورے کرے گی۔ انہوں نے معاہدے کی کامیابی پر آزاد کشمیر کے عوام کو مبارک باد دی۔

اس موقع پر قومی اسمبلی کے اسپیکر راجہ پرویز اشرف نے کہا کہ پاکستان اور آزاد کشمیر کے عوام کے درمیان کوئی دراڑ نہیں ڈال سکتا۔ جوائنٹ ایکشن کمیٹی سے کامیاب مذاکرات کے نتیجے میں امن بحال ہوا ہے، اور ان کے تمام جائز مطالبات حل کیے جائیں گے۔