شمال مشرقی بحیرہ عرب میں ڈیپ ڈپریشن شدت اختیار کر گیا، طوفان کا نام ’شکتی‘ رکھ دیا گیا

شمال مشرقی بحیرہ عرب میں موجود ڈیپ ڈپریشن نے شدت اختیار کر لی ہے اور یہ ایک سمندری طوفان میں تبدیل ہو چکا ہے، جس کا نام ’شکتی‘ رکھا گیا ہے۔

ذرائع کے مطابق ’شکتی‘ کا نام سری لنکا کی جانب سے تجویز کیا گیا ہے، جس کا مطلب ہے "طاقت"۔ ماہرین موسمیات کا کہنا ہے کہ اگلے 24 گھنٹوں کے دوران یہ سسٹم ایک شدید سمندری طوفان میں تبدیل ہو سکتا ہے۔

طوفان کے مرکز میں ہوا کی رفتار تقریباً 75 کلومیٹر فی گھنٹہ ریکارڈ کی گئی ہے، اور امکان ظاہر کیا جا رہا ہے کہ طوفان 6 اکتوبر تک بحیرہ عرب میں موجود رہے گا۔

اس وقت طوفان ’شکتی‘ کراچی کے جنوب میں تقریباً 360 کلومیٹر کے فاصلے پر موجود ہے۔ طوفان کے اثرات کے باعث کراچی سمیت سندھ اور بلوچستان کے مختلف علاقوں میں آج بھی بارش کا امکان ہے۔

ماہی گیروں کو ہدایت کی گئی ہے کہ وہ 5 اکتوبر تک گہرے سمندر کا رخ نہ کریں، کیونکہ اس دوران سمندر میں شدید طغیانی رہنے کا خدشہ ہے۔