فیلڈ مارشل عاصم منیر کی قیادت میں جنگ میں عظیم کامیابی ملی: وزیراعلیٰ پنجاب

وزیراعلیٰ پنجاب مریم نواز نے کہا ہے کہ پاکستان نے آپریشن بنیان مرصوص میں شاندار کامیابی حاصل کی، اور ہمیں اپنی مسلح افواج کی پیشہ ورانہ صلاحیتوں پر فخر ہے۔

لاہور میں نیشنل سکیورٹی اینڈ وار کورس کے وفد سے گفتگو کرتے ہوئے مریم نواز نے کہا کہ فیلڈ مارشل عاصم منیر کی قیادت میں اپنائی گئی مؤثر حکمت عملی سے جنگ میں بڑی فتح ممکن ہوئی۔ انہوں نے کہا کہ موجودہ چیلنجز کا مقابلہ باہمی اتفاق اور مشترکہ کوششوں سے ہی ممکن ہے۔

وزیراعلیٰ پنجاب کا کہنا تھا کہ پاکستان خطے کا ایک اسٹریٹجک لحاظ سے اہم ملک ہے اور اسے اندرونی و بیرونی دونوں محاذوں پر چیلنجز درپیش ہیں۔ عوامی فلاح و بہبود کو اپنی اولین ترجیح قرار دیتے ہوئے مریم نواز نے کہا کہ گڈ گورننس، مؤثر پالیسی سازی اور انتھک محنت ہی ملک کو آگے لے جا سکتی ہے۔

انہوں نے کہا کہ عوام کی بے لوث اور بلاامتیاز خدمت ان کا مشن ہے، اور پنجاب حکومت کی تمام مشینری اس وقت سیلاب متاثرین کی بحالی کے لیے سرگرمِ عمل ہے۔

مریم نواز نے کہا کہ اس وقت سیلاب زدگان کی مدد کو سب سے زیادہ اہمیت دی جا رہی ہے۔ پنجاب میں ایک بڑا ریسکیو اور ریلیف آپریشن کیا گیا، جہاں اب تک 25 لاکھ افراد کو محفوظ مقامات پر منتقل کیا گیا۔ انہوں نے مزید کہا کہ سیلاب متاثرین کو تین وقت کا کھانا فراہم کیا جا رہا ہے، اور پنجاب کے عوام نے اس نوعیت کی تباہی پہلے کبھی نہیں دیکھی۔