آئی سی سی ویمنز ورلڈ کپ : بھارت نے پاکستان کو 88 رنز سے شکست دیدی

کولمبو: آئی سی سی ویمنز کرکٹ ورلڈ کپ کے چھٹے میچ میں راویتی حریف بھارت نے پاکستان کو 88 رنز سے شکست دیدی۔

بھارت کی جانب سے ملنے والے 248 رنز کے ہدف کے تعاقب میں پاکستان کی پوری ٹیم 43 اوورز میں 159 رنز پر ڈھیر ہوگئی۔

پاکستان کی جانب سے سدرہ امین 81 رنز بناکر نمایاں رہیں، نتالیہ پرویز 33، سدرہ نواز نے 14 رنز بنائے جبکہ دیگر کوئی کھلاڑی ڈبل فگر میں بھی داخل نہ ہوسکی۔

اس سے قبل کولمبو کے پریما داسا سٹیڈیم میں کھیلے گئے میچ میں پاکستان ٹیم کی کپتان فاطمہ ثنا نے ٹاس جیت کرپہلے فیلڈنگ کرنے کا فیصلہ کیا ۔ بھارتی ٹیم پہلے بیٹنگ کرتے ہوئے مقررہ 50 اوورز میں 247 رنز بناکر پوری ٹیم آؤٹ ہوگئی۔

بھارت کی طرف سے پرتیکا راول نے 31 ، سمرتی مندھانا نے 23 جبکہ ہارلین دیول 46 رنز کے ساتھ نمایاں رہیں۔

کپتان ہرمن پریت کور 19، جمیما روڈریگز 32، دیپتی شرما 25، سنہ رانا 20 اور وکٹ کیپر بلے باز رچا گھوش نے 35 رنز بنائے۔

قومی ویمنز ٹیم کی جانب سے ڈیانا بیگ نے 4 کھلاڑیوں کو پویلین کی راہ دکھائی جب کہ سعدیہ اقبال ، فاطمہ ثنا نے 2،2 اور رامین شمیم، نشرا سندھو نے ایک ایک وکٹ حاصل کی۔

خیال رہے کہ اس سے قبل قومی ٹیم کو اپنے پہلے میچ میں بھی بنگلہ دیش کے ہاتھوں شکست کا سامنا کرنا پڑا تھا۔