Advertisement
پاکستان

غزہ جنگ بندی اور امن معاہدہ مشرق وسطیٰ میں پائیدار امن کے قیام کا تاریخی موقع ہے، وزیراعظم

پاکستان دوست ممالک کے ساتھ مل کر امن کے لیے کام جاری رکھے گا، فلسطینی عوام کے لیے امن، سلامتی اور وقار یقینی بنایا جائے گا،شہبازشریف

GNN Web Desk
شائع شدہ ایک سال قبل پر اکتوبر 9 2025، 12:19 شام
ویب ڈیسک کے ذریعے
غزہ جنگ بندی اور امن معاہدہ مشرق وسطیٰ میں پائیدار امن کے قیام کا تاریخی موقع ہے، وزیراعظم

اسلام آباد: وزیر اعظم شہباز شریف نے غزہ میں جنگ بندی اور امن منصوبے کے حوالےسے حماس اور اسرائیل کے مابین ہونے والی مذاکرات میں کامیابی کا خیر مقدم کرتے ہوئے کہا ہے کہ یہ معاہدہ مشرق وسطیٰ میں پائیدار امن کے قیام کا تاریخی موقع ہے۔

تفصیلات کے مطابق سماجی رابطوں کے پلیٹ فارم ایکس (سابقہ ٹوئٹر) پر اپنے بیان میں وزیراعظم شہباز شریف نے کہا کہ امریکی صدر ڈونلڈ ٹرمپ کی مذاکراتی عمل میں قیادت اور ان کا عالمی امن کے لیے غیر متزلزل عزم قابلِ تعریف ہے۔

بیان میں وزیراعظم نے قطر، مصر اور ترکی کی قیادت کو بھی خراجِ تحسین پیش کیا، جنہوں نے معاہدے کے لیے انتھک محنت کی۔

ایکس پر جاری بیان میں شہباز شریف نے فلسطینیوں کو بھی زبردست خراجِ عقیدت پیش کرتے ہوئے کہا کہ انہوں نے بے مثال مصائب برداشت کیے، جو تاریخ میں دوبارہ کبھی نہیں دہرائے جانے چاہییں۔

بیان میں شہباز شریف نے مسجد اقصیٰ میں حالیہ اشتعال انگیزیوں پر تشویش کا اظہار کرتے ہوئے کہا کہ دنیا کو قابضین اور غیر قانونی آبادکاروں کو جواب دہ ٹھہرانا ہوگا، عالمی برادری سے اپیل ہے کہ امن کی کوششوں کو کمزور کرنے والے اقدامات روکے جائیں۔

ان کامزید کہنا تھا پاکستان دوست ممالک کے ساتھ مل کر امن کے لیے کام جاری رکھے گا، فلسطینی عوام کے لیے امن، سلامتی اور وقار یقینی بنایا جائے گا، فلسطینیوں کے حقوق اقوام متحدہ کی قراردادوں کے مطابق تسلیم کیے جائیں۔

Advertisement
رجحانات
Advertisement