خیبر پختونخوا وزیر اعلی انتخاب: پی ٹی آئی اور سنی اتحاد کونسل کے ارکان اسمبلی آزاد قرار

اسلام آباد: الیکشن کمیشن آف پاکستان (ای سی پی ) نے علی امین گنڈاپور کے استعفیٰ کے بعد خیبر پختونخوا اسمبلی میں ہونے والے وزارت اعلی کے الیکشن سے قبل صوبائی اور قومی اسمبلی میں سیاسی جماعتوں کی پارٹی پوزیشن جاری کر دی۔

الیکشن کمیشن نے سنی اتحاد کونسل کے تمام اراکین کو آزاد قرار دے دیا ، الیکشن کمیشن کے مطابق پی ٹی آئی کے حمایت یافتہ تمام اراکین بھی آزاد تصور ہوں گے۔

ای سی پی کا کہنا ہے کہ پنجاب، خیبر پختونخوا ، سندھ اور قومی اسمبلی کی پارٹی پوزیشنز ازسرنو ترتیب دی گئی ہیں ، سپریم کورٹ فیصلے کے بعد ارکان کی وابستگی پی ٹی آئی یا سنی اتحاد کونسل سے ظاہر نہیں ہو گی۔

خیا ل رہے کہ الیکشن کمیشن کی جانب سے یہ فیصلہ سپریم کورٹ کے 25 اگست کے حکم کی روشنی میں نوٹیفکیشن جاری کر دیا گیا ہے۔

الیکشن کمیشن کا کہنا ہے کہ سپریم کورٹ کے25 اگست 2025 کے تفصیلی فیصلے کے بعد اراکین کی وابستگی پی ٹی آئی یا سنی اتحاد کونسل سے ظاہر نہیں ہوگی۔ سپریم کورٹ کے آئینی بینچ کے فیصلے کی روشنی میں قومی اسمبلی سمیت صوبائی اسمبلیوں میں پارٹی پوزیشن بھی تبدیل ہوگئی۔

واضح رہے کہ دستاویز کے مطابق خیبر پختونخوا اسمبلی میں آزاد ارکان کی تعداد 92 ہےجن میں مسلم لیگ ن اور جے یو آئی کے 17،17 ارکان ہیں۔ 

اسی طرح پیپلزپارٹی کے 11،عوامی نیشنل پارٹی کے 4 ارکان اسمبلی ہیں،جبکہ پی ٹی آئی نطریاتی کے 3 ارکان بھی خیبرپختونخوا اسمبلی کا حصہ ہیں۔ سنی اتحاد کونسل جماعت تسلیم،ایک رکن خیبر پختونخوا اسمبلی کا حصہ ہے۔