اسرائیلی حراست سے رہائی کے بعد سابق سینیٹر مشتاق احمد پاکستان پہنچ گئے،ائیر پورٹ پر شاندار استقبال

اسلام آباد:اسرائیلی جیل سے رہائی پانے والے جماعت اسلامی کے سابق سینیٹر مشتاق احمد پاکستان پہنچ گئےجہاں اسلام آباد ایئرپورٹ پر فلسطینی پرچموں کے ساتھ ان کا شاندار استقبال کیا گیا۔

تفصیلات کے مطابق جماعت اسلامی کے سابق سینیٹر مشتاق اسرائیلی قید سے رہائی پانے کے بعد جمعرات کو نجی ایئرلائن کی پرواز کے ذریعے بحرین سے اسلام آباد پہنچے۔

اسلام آباد ایئرپورٹ پر فلسطینی پرچموں کی بہار،فلسطین کے حق اور اسرائیل مخالف نعرے لگائے گئے۔

واضح رہے کہ سابق سینیٹر مشتاق احمد نے 45 جہازوں پر مشتمل ’گلوبل صمود فلوٹیلا‘ میں پاکستانی وفد کی قیادت کی تھی، جس نے گزشتہ ماہ اسپین سے غزہ کے لیے امدادی سامان کی اسرائیلی ناکہ بندی توڑنے کے لیے سفر کا آغاز کیا تھا۔

گلوبل صمود فلوٹیلا میں انسانی حقوق کے کارکنوں اور سیاست دانوں سمیت معروف ماحولیاتی کارکن گریٹا تھنبرگ بھی موجود تھیں۔

تاہم جیسے ہی یہ قافلہ غزہ کے قریب پہنچا، اسرائیلی فورسز نے اسے روک لیا اور جہاز پر سوار تمام کارکنوں کو حراست میں لینے کے بعد ملک بدر کر دیا۔

اس سے قبل سماجی رابطے کے پلیٹ فارم ایکس پر اردن میں پاکستانی سفارت خانے نے اطلاع دی کہ سابق سینیٹر محفوظ طور پر پاکستان روانہ ہو گئے ہیں۔

Alhamdulillah, Senator Mushtaq Ahmad has safely departed for Pakistan.
In accordance with the instructions of the Honorable Deputy Prime Minister of Pakistan, the Embassy of Pakistan in Amman ensured all necessary arrangements were made for his safe and smooth departure.… pic.twitter.com/jjy30Tnrdm

— Pakistan Embassy Jordan (@PakinJordan) October 8, 2025

ایکس پر جاری بیان میں کہا گیا تھا ’پاکستان کے معزز نائب وزیراعظم کی ہدایات کے مطابق، اردن میں پاکستانی سفارت خانے نے ان کی محفوظ اور ہموار روانگی کے لیے تمام ضروری انتظامات کو یقینی بنایا‘۔