وزیر اعلیٰ مریم نواز کا فضائی آلودگی پھیلانے کے واقعات کا نوٹس

لاہور: وزیر اعلیٰ پنجاب مریم نواز شریف نے فصلوں کی باقیات جلانے اور فضائی آلودگی پھیلانے کے واقعات کا نوٹس لے لیا۔

تفصیلات کے مطابق وزیر اعلیٰ پنجاب مریم نواز نے ماحولیاتی قوانین کی خلاف ورزی پر گرفتاری اور بھاری جرمانے کی ہدایت کر دی۔

محکمہ ماحولیات پنجاب نے کہا ہے کہ دیپالپور میں فصل کی باقیات جلانے پر ایک شخص کو گرفتار کیا گیا ہے۔ اور 5 ایکڑ رقبے پر پھیلی آگ بجھا دی گئی۔ جبکہ تھانہ سٹی دیپالپور میں مقدمہ بھی درج کیا گیا ہے۔

اس حوالے سے سینئر وزیر پنجاب مریم اورنگزیب نے کہا ہے کہ پنجاب بھر میں آلودگی پھیلانے والوں کو فوری گرفتار کیا جائے گااور اسموگ پھیلانے والوں سے کوئی رعایت نہیں برتیں گے۔