مکہ مکرمہ میں منشیات اسمگلنگ کے جرم میں پاکستانی تارکِ وطن کو سزائے موت

سعودی عرب کی وزارتِ داخلہ کے مطابق مکہ مکرمہ ریجن میں ایک پاکستانی شہری کو منشیات اسمگل کرنے کے جرم میں دی گئی سزائے موت پر عملدرآمد کر دیا گیا ہے۔

بیان میں کہا گیا ہے کہ ملزم کو مجاز عدالت نے جرم ثابت ہونے پر سزائے موت سنائی تھی، جسے سپریم کورٹ نے بھی برقرار رکھا۔ تمام قانونی مراحل مکمل ہونے کے بعد سزا پر عملدرآمد کیا گیا۔

مزید برآں، وزارتِ داخلہ کے مطابق دمام میں دہشت گردی کی وارداتوں میں ملوث ایک سعودی شہری کو بھی سزائے موت دے دی گئی ہے۔

حکام کا کہنا ہے کہ مذکورہ سعودی شہری پر سیکیورٹی اہلکاروں پر حملے، ایک جج کے اغوا اور قتل، تیل کی پائپ لائنوں کو تباہ کرنے اور دھماکہ خیز مواد تیار کرنے جیسے سنگین الزامات تھے، جن میں اسے قصوروار پایا گیا۔