ادب کا نوبیل انعام ہنگری کے ناول نگارلازلو کراسناہورکائی کے نام

اسٹاک ہوم: سویڈن کی رائل سویڈش اکیڈمی نے 2025 کا نوبیل انعام برائے ادب ہنگری کے معروف ناول نگار اور اسکرین رائٹر لازلو کراسناہورکائی کو دینے کا اعلان کیا ہے۔
غیر ملکی میڈیا رپورٹس کے مطابق اکیڈمی کی جانب سے جاری کردہ بیان میں کہا گیا ہے کہ لازلو کراسناہورکائی ایک معتبر اور متاثر کن کہانیاں لکھنے والے مصنف ہیں۔ ان کا طرزِ تحریر یورپ کے مشہور ادیب فرانز کافکا جیسا ہے، جو قاری کو گہرائی میں لے جاتا ہے اور سوچنے پر مجبور کر دیتا ہے۔

ادب کے نوبیل انعام کے فاتح کا فیصلہ 18 رکنی سوئیڈش اکیڈمی کرتی ہے اور عموماً اس مقصد کے لیے کسی مصنف کے زندگی بھر کے کام مدنظر رکھا جاتا ہے، کمٹی کے مطابق لازلو کرسز ناہور کائی ایسے مصنف ہیں جو مشکل وقت میں بھی آرٹ کی طاقت کو یقینی بناتے رہے۔

نوبیل کمیٹی کی جانب سے مزید بتای گیا کہ71 سالہ لازلو کو یہ ایوارڈ ان کے ”دل کو چھو لینے والے اور بصیرت افروز ادبی کام“ پر دیا گیا ہے، جو ”قیامت خیز حالات کے درمیان بھی فن کی طاقت کا یقین دلاتے ہیں“۔

BREAKING NEWS
The 2025 #NobelPrize in Literature is awarded to the Hungarian author László Krasznahorkai “for his compelling and visionary oeuvre that, in the midst of apocalyptic terror, reaffirms the power of art.” pic.twitter.com/vVaW1zkWPS

— The Nobel Prize (@NobelPrize) October 9, 2025

خیال رہے کہ وہ ہنگری کے دوسرے ادیب ہیں جنہیں ادب کا نوبل انعام ملا۔ اس سے پہلے امری کرتیز نے 2002 میں یہ اعزاز حاصل کیا تھا۔

لازلو 1954 میں جنوب مشرقی ہنگری کے ایک چھوٹے سے شہر گیولا میں پیدا ہوئے، جو رومانیہ کی سرحد کے قریب واقع ہے،ان کا شمار یورپ کے منفرد طرزِ تحریر رکھنے والے ادیبوں میں ہوتا ہے۔ ان کا انداز مشکل، گہرا اور فکری ہوتا ہے، جسے بعض ناقدین نے ”جنونی“ بھی قرار دیا ہے۔ ان کی تحریر لمبے جملوں اور کم پیراگراف پر مشتمل ہوتی ہے، جو قاری کو ایک منفرد تجربے سے گزارتی ہے۔

ان کے ابتدائی ناولوں میں اکثر ہنگری سے لے کر جرمنی تک وسطی یورپ کے قصبوں اور دیہات کے ماحول کو دکھایا جاتا تھا مگر بعد کے تخلیقی کام میں قارئین کومشرق بعید تک لے جایا گیا۔

لازلو کے پہلے مشہور ناول ”Satantango“ نے 1985 میں شہرت حاصل کی، جو کمیونزم کے خاتمے سے پہلے ایک خستہ حال گاؤں کی زندگی پر مبنی ہے۔

نوبیل انعام کے ساتھ اس سال کی انعامی رقم 1.2 ملین امریکی ڈالر ہے۔ اس اعزاز کے ساتھ لازلو ان نامور ادیبوں کی فہرست میں شامل ہو گئے ہیں جن میں ٹونی موریسن، ارنسٹ ہیمنگوے اور کازوو اشی گورو جیسے عظیم نام شامل ہیں۔