بھارت کا افغانستان میں اپنا سفارتخانہ دوبارہ کھولنے کا اعلان

نئی دہلی: بھارت نے افغانستان میں طالبان کے اقتدار میں آنے کے بعد اپنا سفارتی مشن بحال کرنے کا اعلان کرتے ہوئے کابل میں سفارتخانہ دوبارہ کھولنے کا اعلان کر دیا۔

بھارتی میڈیا کے مطابق وزیرِ خارجہ ایس جے شنکر نے جمعے کو اعلان کیا ہے کہ بھارت کابل میں اپنے تکنیکی مشن کو اپ گریڈ کر کے اسے سفارتخانے میں تبدیل کرے گا،انہوں نے یہ بات اپنے افغان ہم منصب امیر خان متقی کے ساتھ دوطرفہ ملاقات کے دوران کہی، جو ان دنوں بھارت کے دورے پر ہیں۔

جے شنکر نے کہا کہ بھارت اب کابل میں اپنے تکنیکی مشن کو سفارتخانے کی سطح پر اپ گریڈ کرے گا۔

خیال رہے کہ یہ پیشرفت اس وقت سامنے آئی ہے جب افغان وزیر خارجہ بھارت کے سرکاری دورے پر ہیں،امیر خان متقی کا یہ دورہ 2021 میں طالبان کے اقتدار سنبھالنے کے بعد کسی طالبان رہنما کا بھارت کا پہلا دورہ ہے۔

واضح رہے کہ تاریخی طور پر بھارت اور افغانستان کے تعلقات دوستانہ رہے ہیں، تاہم 2021 میں امریکا کے انخلا اور طالبان کے دوبارہ اقتدار میں آنے کے بعد بھارت نے کابل میں اپنا سفارتخانہ بند کر دیا تھا۔

تاہم اب ایک سال بعد بھارت نے ایک محدود مشن دوبارہ کھولا تاکہ تجارت، طبی معاونت اور انسانی ہمدردی کی بنیاد پر امداد فراہم کی جا سکے۔