ٹرمپ کا خواب چکنا چور، امن کا نوبیل انعام ماریہ کورینا مچاڈو کے نام

 امن کا نوبیل انعام 2025 ماریہ کورینا مچاڈو کو  دے دیا گیا۔ 

سویڈن کی  رائل سوئڈش اکیڈمی آف سائنس کے سربراہ جورجین واٹن فریڈنس نے نوبیل امن انعام 2025 اعلان کرتے ہوئے کہا کہ امن کا نوبیل انعام وینزویلا کی جمہوریت نواز رہنما ماریہ کورینا مچاڈو کو دیا جاتا ہے۔ 

BREAKING NEWS
The Norwegian Nobel Committee has decided to award the 2025 #NobelPeacePrize to Maria Corina Machado for her tireless work promoting democratic rights for the people of Venezuela and for her struggle to achieve a just and peaceful transition from dictatorship to… pic.twitter.com/Zgth8KNJk9

— The Nobel Prize (@NobelPrize) October 10, 2025

کمیٹی نے کہا کہ ماریہ کورینا امن انعام جیتنے کے لیے الفریڈ نوبل کی وصیت میں بیان کردہ معیار پر پورا اترتی ہیں، ماریہ کورینا نے وینزویلا کی اپوزیشن کو متحد کیا، اس کے علاوہ انہوں نے وینزویلا میں عسکریت پسندی کے خلاف بھرپور مزاحمت کی۔

نوبیل امن کمیٹی کا مزید کہنا تھا کہ ماریہ جمہوریت کی پرامن منتقلی کے لیے اپنی حمایت میں ثابت قدم رہی ہیں۔

خیال رہے کہ ماریہ کورینا وینزویلا کی حزب اختلاف کی سیاستدان ہیں ، انہوں نے 2011 سے 2014 تک وینزویلا کی قومی اسمبلی کی منتخب رکن کے طور پر خدمات انجام دیں، 2018 میں انہیں بی بی سی کی 100 خواتین میں شامل کیا گیا۔

ماریہ کورینا کو آئرن لیڈی کے نام سے بھی جانا جاتا ہے ، 20 سال پہلے آزاد اور منصفانہ انتخابات کے حق میں آواز اٹھائی۔

واضح رہے امن کا نوبیل انعام (نوبیل پیس پرائز) اس شخص کو دیا جاتا ہے جس نے ملکوں کے درمیان رفاقت بڑھانے، مستقل فوجیں ختم یا کم کرنے، اور امن کے قیام اور فروغ کے لیے سب سے زیادہ یا بہترین کام کیا ہو۔

نوبیل انعام سویڈن کی کاروباری شخصیت الفریڈ نوبیل کی یاد میں دیا جاتا ہے جنھوں نے ڈائنامائٹ (بارود) ایجاد کیا۔ انھوں نے اپنے تقریباً تمام اثاثے یہ انعامات دینے کے لیے ایک فنڈ میں جمع کرا دیے تھے اور  سال 1901 میں پہلی مرتبہ نوبیل انعامات تقسیم کیے گئے تھے۔