چیف جسٹس اسلام آباد ہائیکورٹ کا خط، پاکستان بار کونسل کا ہنگامی اجلاس طلب

تفصیلات کے مطابق اسلام ہائیکورٹ پر حملے کے معاملے پر چیف جسٹس اطہر من اللہ نے  بار کونسل کو خط لکھا، چیف جسٹس اطہر من اللہ کے خط کے تناظر میں پاکستان بار کونسل نے ہنگامی اجلاس طلب کرلیا۔پاکستان بار کونسل ایگزیکٹو کمیٹی کی ہنگامی میٹنگ پندرہ فروری کو طلب کی گئی ہے۔ایگزیکٹو کمیٹی کا ہنگامی اجلاس پیر دن ساڈھے گیارہ بجے اسلام آباد آفس میں ہو گا۔

پاکستان بار کونسل کا کہنا ہے کہ  اجلاس میں اسلام آباد ڈسٹرکٹ کچہری میں وکلا چیمبر گرانے کا معاملہ زیر بحث آئے گا ،اسلام آباد ہائی کورٹ کے احاطہ میں بدقسمتی سے پیش آنے والا تشدد کا واقعہ بھی زیر بحث آئے گا ، اس حوالے چیف جسٹس اطہر من اللہ کے وائس چیئرمین پاکستان بار کونسل کو لکھے گئے خط پر بھی بحث ہو گی۔

واضح رہے کہ  ضلع کچہری میں تعمیر اپنے غیر قانونی چیمبرز گرانے پر وکلاء نے احتجاج کرتے ہوئے اسلام آباد ہائیکورٹ میں توڑ پھوڑ کی تھی۔جس کے بعد چیف جسٹس اسلام آباد ہائیکورٹ نے ہائیکورٹ اور ڈسٹرکٹ کورٹ کو تاحکم ثانی بند کردیا تھا۔