پی ٹی آئی کا چیف جسٹس کو خط، سہیل آفریدی سے حلف لینے کی اپیل

لاہور: پی ٹی آئی کی جانب سے چیف جسٹس پشاور ہائی کورٹ کے نام لکھا گیا خط دنیا نیوز کو موصول ہوگیا ہے۔

یہ خط نومنتخب وزیراعلیٰ خیبرپختونخوا سہیل آفریدی سے حلف لینے کے لیے ارسال کیا گیا، جس میں بتایا گیا ہے کہ علی امین گنڈاپور کے استعفے کے بعد سہیل آفریدی نے 90 ووٹ حاصل کر کے وزارت اعلیٰ کا انتخاب جیتا۔

خط میں یہ بھی تحریر ہے کہ 12 اکتوبر کو وزیر اعلیٰ کے عہدے کے لیے چار امیدواروں نے کاغذاتِ نامزدگی جمع کرائے۔ تاہم اجلاس کے دوران اپوزیشن لیڈر کی جانب سے اعتراض کیا گیا کہ علی امین گنڈاپور کا استعفیٰ گورنر کی طرف سے تاحال منظور نہیں ہوا۔

مزید کہا گیا کہ اپوزیشن کا مؤقف ہے کہ جب تک گورنر استعفیٰ منظور نہیں کرتے، نئے وزیراعلیٰ کے انتخاب کا عمل آئینی طور پر ممکن نہیں۔ ساتھ ہی یہ بھی نشاندہی کی گئی کہ گورنر حلف برداری کے لیے دستیاب نہیں۔

خط کے اختتام پر مؤقف اپنایا گیا کہ نومنتخب وزیراعلیٰ سے حلف لینا فوری اور ناگزیر ہے، لہٰذا گزارش ہے کہ اسپیکر اسمبلی یا کسی اور مجاز شخصیت کو نامزد کر کے حلف کی کارروائی مکمل کروائی جائے۔