افغانی جارحیت کے خلاف قربانیاں: 12 شہداء کی نماز جنازہ راولپنڈی میں ادا

راولپنڈی: افغان سرزمین سے کی گئی جارحیت کے خلاف وطن کا دفاع کرتے ہوئے شہید ہونے والے 12 جوانوں کی نمازِ جنازہ چکلالہ گیریژن، راولپنڈی میں ادا کر دی گئی۔

آئی ایس پی آر کے مطابق، نماز جنازہ میں چیف آف آرمی اسٹاف فیلڈ مارشل سید عاصم منیر نے شرکت کی۔ اس موقع پر وفاقی وزرا، گورنر خیبر پختونخوا، اعلیٰ سول و عسکری حکام اور شہداء کے لواحقین سمیت شہریوں کی بڑی تعداد موجود تھی۔

نماز جنازہ کے موقع پر وفاقی وزیر دفاع خواجہ آصف نے خطاب کرتے ہوئے شہداء کو خراجِ عقیدت پیش کیا۔ ان کا کہنا تھا کہ "پاکستان کے عوام ان بہادر سپاہیوں کے مقروض ہیں، جنہوں نے افغان سرحد سے ہونے والی جارحیت کا ڈٹ کر مقابلہ کرتے ہوئے اپنی جانوں کا نذرانہ دیا۔"

انہوں نے مزید کہا کہ "ہمارے یہ سپوت ان دہشت گرد عناصر کے خلاف لڑے جو بھارتی حمایت سے پاکستان میں بدامنی پھیلانا چاہتے ہیں۔ مسلح افواج کسی بھی قسم کی جارحیت یا سازش کو ناکام بنانے کے لیے ہمہ وقت تیار ہیں۔"