شہباز شریف اور ڈونلڈ ٹرمپ کی ملاقات، گرمجوش مصافحہ

مصر کے شہر شرم الشیخ میں غزہ امن سربراہ اجلاس کے موقع پر وزیراعظم محمد شہباز شریف اور امریکی صدر ڈونلڈ ٹرمپ کے درمیان ملاقات ہوئی۔ اس موقع پر دونوں رہنماؤں نے گرمجوشی سے مصافحہ کیا اور خوشگوار تبادلۂ کلام کیا۔

شرم الشیخ میں منعقدہ اس امن اجلاس میں 28 ممالک اور متعدد بین الاقوامی ادارے شریک ہیں۔ وزیراعظم شہباز شریف نے اس کانفرنس سے قبل مختلف عالمی رہنماؤں سے الگ الگ ملاقاتیں بھی کیں جن میں فلسطینی صدر محمود عباس، آذربائیجان کے صدر الہام علی یف، آرمینیا کے وزیرِ اعظم نکول پاشنیان، اردن کے شاہ عبداللہ دوم، بحرین کے شاہ حمد بن عیسیٰ الخلیفہ، اقوامِ متحدہ کے سیکرٹری جنرل انتونیو گوٹریس، انڈونیشیا کے صدر، جرمن چانسلر، اسپین اور اٹلی کے وزرائے اعظم، اور سعودی وزیرِ خارجہ شہزادہ فیصل بن فرحان شامل تھے۔

شرم الشیخ پہنچنے پر مصری صدر عبدالفتاح السیسی نے وزیراعظم شہباز شریف کا باقائدہ استقبال کیا۔

وزیراعظم نے ملاقاتوں کے دوران فلسطینی عوام سے یکجہتی اور ان کی سفارتی و اخلاقی معاونت جاری رکھنے کا عزم دوبارہ دہرایا۔

یاد رہے کہ اس غزہ امن سربراہ اجلاس کا بنیادی مقصد وہاں فوری جنگ بندی کے لیے عالمی سطح پر مشترکہ اقدامات اور امن کی بحالی کے لیے راستے تلاش کرنا ہے۔