چین نے پاکستان و امریکا کے درمیان معدنی نمونوں سے متعلق خبروں کو بے بنیاد قرار دے دیا

چینی وزارت خارجہ کے ترجمان نے واضح کیا ہے کہ پاکستان اور چین ہر موسم کے شراکت دار ہیں اور ان کے درمیان اسٹریٹیجک تعلقات وقت کی کسوٹی پر پورے اترے ہیں۔

ترجمان نے کہا کہ دونوں ممالک نے باہمی دلچسپی کے کلیدی معاملات پر اعلیٰ سطحی اعتماد اور قریبی مشاورت کا رشتہ برقرار رکھا ہوا ہے۔

انہوں نے مزید کہا کہ پاکستان اور امریکا کے درمیان معدنیات کے شعبے میں تعاون پر تبادلہ خیال جاری ہے، اور اسلام آباد نے یقین دہانی کرائی ہے کہ واشنگٹن کے ساتھ اس کے روابط، بیجنگ کے مفادات یا دوطرفہ تعاون کو نقصان نہیں پہنچائیں گے۔

ترجمان کے مطابق، پاکستانی قیادت کی جانب سے امریکی حکام کو دکھائے گئے نمونے دراصل مقامی مارکیٹ سے حاصل کردہ قیمتی پتھروں پر مشتمل تھے۔ انہوں نے اس حوالے سے ذرائع ابلاغ میں شائع خبروں کو یا تو غلط فہمی پر مبنی یا مکمل طور پر من گھڑت قرار دیا اور کہا کہ ان کا مقصد چین اور پاکستان کے تعلقات میں دراڑ ڈالنا ہے۔

چینی ترجمان نے یہ بھی واضح کیا کہ چین کی جانب سے حالیہ ریئر ارتھ (نایاب زمینی عناصر) کی برآمد پر کنٹرول سے متعلق اقدامات کا پاکستان سے کوئی تعلق نہیں ہے۔

انہوں نے زور دیا کہ چینی حکومت اپنے برآمدی ضوابط کو بین الاقوامی قوانین کے مطابق مزید مؤثر بنا رہی ہے، تاکہ عالمی امن، علاقائی استحکام، اور بین الاقوامی ذمہ داریوں جیسے عدم پھیلاؤ کے اصولوں کو بہتر انداز میں پورا کیا جا سکے۔