گورنر خیبرپختونخوا نے نومنتخب وزیراعلیٰ سہیل آفریدی سے حلف لینے پر آمادگی ظاہر کر دی

گورنر خیبرپختونخوا نے نومنتخب وزیراعلیٰ سہیل آفریدی سے حلف لینے پر آمادگی ظاہر کر دی

پشاور ہائیکورٹ کی ہدایت پر گورنر خیبرپختونخوا فیصل کریم کنڈی نے نومنتخب وزیراعلیٰ سہیل آفریدی سے حلف لینے پر آمادگی ظاہر کر دی ہے۔

ذرائع کے مطابق، پشاور ہائیکورٹ نے محفوظ فیصلہ سناتے ہوئے گورنر کو حکم دیا کہ وہ بدھ کے روز شام 4 بجے سہیل آفریدی سے وزارتِ اعلیٰ کا حلف لیں۔ عدالت نے واضح کیا کہ اگر گورنر مقررہ وقت پر حلف نہ لیں، تو پھر خیبرپختونخوا اسمبلی کے اسپیکر کو یہ ذمہ داری ادا کرنی ہوگی۔

عدالتی فیصلے پر ردعمل دیتے ہوئے گورنر فیصل کریم کنڈی نے کہا کہ انہوں نے کبھی بھی حلف لینے سے انکار نہیں کیا، اور وہ آئین کے مطابق اپنی ذمہ داری نبھائیں گے۔

گورنر نے مزید کہا کہ ان کا مؤقف پہلے ہی عدالت میں جمع کروایا جا چکا ہے، اور وہ آئینی تقاضوں پر مکمل عملدرآمد کے لیے پرعزم ہیں۔

فیصل کریم کنڈی کا کہنا تھا کہ وہ رات کے دوران خیبرپختونخوا پہنچنے کی کوشش کریں گے، تاہم گورنر کے پاس سرکاری طیارہ نہ ہونے کے باعث وزیراعلیٰ سندھ سے طیارہ فراہم کرنے کی درخواست کی گئی ہے۔

ایک صحافی کے سوال کے جواب میں گورنر نے مسکراتے ہوئے کہا، "بلاول بھٹو سے کان میں ہونے والی باتیں میڈیا کو نہیں بتا سکتا۔"