پاکستان کا پہلا ہائپر اسپیکٹرل سیٹلائٹ 19 اکتوبر کو لانچ ہوگا

پاکستان کے خلائی تحقیقاتی ادارے سپارکو نے اعلان کیا ہے کہ ملک کا پہلا ہائپر اسپیکٹرل سیٹلائٹ (HS-1) 19 اکتوبر 2025 کو چین کے جیوچوان سیٹلائٹ لانچ سینٹر سے خلا میں بھیجا جائے گا۔

سپارکو کے مطابق، یہ مشن پاکستان کے قومی خلائی پروگرام میں ایک انقلابی سنگ میل ہے، جو ملک کو شہری منصوبہ بندی، زرعی ترقی، ماحولیاتی نگرانی اور قدرتی آفات کے انتظام جیسے شعبوں میں خلائی ٹیکنالوجی کی نئی سطح پر لے جائے گا۔

ہائپر اسپیکٹرل امیجنگ ایک جدید ٹیکنالوجی ہے جو سینکڑوں باریک رنگی بینڈز کو ریکارڈ کرتی ہے، جس کے ذریعے سائنسدان زمین کی سطح پر موجود مواد، فصلوں کی صحت، معدنیات، آلودگی اور ماحولیاتی تغیرات کا گہرائی سے تجزیہ کر سکتے ہیں۔

بیان کے مطابق، HS-1 سیٹلائٹ:

پریسِژن فارمنگ کے ذریعے زرعی پیداوار میں 15-20 فیصد اضافے میں مدد دے گا؛فصلوں کی نگرانی، مٹی کی نمی، اور آبپاشی کے نظام کی جانچ کی سہولت فراہم کرے گا.

ماحولیاتی تبدیلیوں، شہری پھیلاؤ اور انفراسٹرکچر کی میپنگ میں کلیدی کردار ادا کرے گا؛

اور سیلاب، لینڈ سلائیڈنگ اور دیگر قدرتی آفات کی بروقت نشاندہی میں معاون ہوگا۔

یہ سیٹلائٹ PRSS-1 (2018)، EO-1 (جنوری 2025) اور KS-1 (جولائی 2025) کے بعد پاکستان کے بڑھتے ہوئے ریموٹ سینسنگ سیٹلائٹ بیڑے کا حصہ بنے گا۔

سپارکو کا کہنا ہے کہ یہ مشن قومی خلائی پالیسی اور وژن 2047 کا حصہ ہے، جس کا مقصد پاکستان کو سائنس، ٹیکنالوجی اور اختراع میں خودکفیل اور عالمی سطح پر مؤثر بنانا ہے۔