انڈونیشیا چین سے جے-10 لڑاکا طیارے خریدے گا، وزیر دفاع کی تصدیق

جکارتہ: انڈونیشیا کے وزیر دفاع سجافری سیامسودین نے تصدیق کی ہے کہ انڈونیشیا جلد چینگدو جے-10 لڑاکا طیارے چین سے حاصل کرے گا۔ یہ گزشتہ ایک دہائی کے دوران بیجنگ سے دفاعی سازوسامان کی پہلی بڑی خریداری تصور کی جا رہی ہے۔

انڈونیشین بزنس پوسٹ کے مطابق، وزیردفاع نے وزارتِ دفاع میں میڈیا سے گفتگو کرتے ہوئے کہا کہ یہ طیارے جلد جکارتہ کی فضاؤں میں نظر آئیں گے۔ تاہم، انہوں نے تعداد، ماڈلز یا ترسیلی نظام کی تفصیلات بتانے سے گریز کیا۔

جے-10 طیاروں کی خریداری کی خبروں کو صدر پربووو سوبیانتو کے ستمبر میں چین کے سرکاری دورے سے جوڑا جا رہا ہے، جہاں چینی قیادت کے ساتھ 42 جے-10 "ویگرس ڈریگن" طیاروں کی ممکنہ ڈیل پر تبادلہ خیال کیا گیا تھا۔

انڈونیشیا کی فضائیہ کے ڈپٹی چیف، ایئر مارشل ٹیڈی رزالیہادی پہلے ہی اس بات کی تصدیق کر چکے ہیں کہ تکنیکی ٹیم اس منصوبے کا جائزہ لے رہی ہے۔

وزارتِ دفاع کے ترجمان بریگیڈیئر جنرل فریگا ویناس کا کہنا تھا کہ جے-10 کی خریداری ابھی زیرغور ہے اور اسے انڈونیشیا کی دفاعی حکمت عملی "پریسائی تریسولا نوسانتارا" کے تناظر میں پرکھا جا رہا ہے۔

اس سے قبل، ڈپٹی وزیر دفاع ڈونی ارموان توافانتو نے واضح کیا تھا کہ انڈونیشیا غیرجانبدار ملک ہے اور کسی اتحاد کا حصہ نہ ہونے کی وجہ سے اپنی دفاعی خریداریوں میں آزاد ہے۔

ڈونی کے مطابق، جے-10 طیارے انڈونیشیا کو پہلی بار مئی 2025 کے چینی ایئر شو کے دوران پیش کیے گئے تھے، مگر تب کوئی حتمی فیصلہ نہیں کیا گیا تھا۔

یاد رہے، یہ وہی جے-10 سی طیارے ہیں جو پاکستان فضائیہ کے پاس بھی موجود ہیں اور رپورٹوں کے مطابق، مئی میں بھارت کے ساتھ مختصر جنگ کے دوران پاکستانی فضائیہ نے ان کا استعمال کرتے ہوئے رافیل سمیت 6 بھارتی طیارے مار گرائے تھے۔