مصنوعی ذہانت سے چلنے والا نیا امریکی جنگی ڈرون

امریکی دفاعی ٹیکنالوجی کمپنی شِیلڈ اے آئی (Shield AI) نے ایک نیا مصنوعی ذہانت سے چلنے والا بغیر پائلٹ لڑاکا طیارہ متعارف کرایا ہے، جو ورٹیکل ٹیک آف اور لینڈنگ (VTOL) کی صلاحیت رکھتا ہے۔

کمپنی کے مطابق، یہ نیا ڈرون ’ایکس بَیٹ‘ (X-BAT) بحری اور دشوار گزار علاقوں میں آپریشنز کے لیے تیار کیا گیا ہے۔ طیارے میں استعمال ہونے والا ہائیو مائنڈ (Hivemind) خودکار نظام اسے خودمختار پرواز، ہدف کی شناخت اور نیویگیشن کی صلاحیت فراہم کرتا ہے۔

ورٹیکل ٹیک آف اور لینڈنگ کی بدولت ایکس بَیٹ کو کسی بھی مقام سے آپریٹ کیا جا سکتا ہے اور اسے رن وے کی ضرورت نہیں۔

کمپنی کے مطابق یہ ڈرون فی الحال تیاری کے مراحل میں ہے۔ مکمل اسلحے کے ساتھ اس کی آپریشنل رینج 2 ہزار ناٹیکل میل سے زائد ہوگی، جب کہ اس کی لمبائی 26 فٹ اور پروں کا پھیلاؤ 39 فٹ ہے۔

ماہرین کے مطابق، ڈرون کا کمپیکٹ سائز اسے محفوظ رکھنے، منتقل کرنے اور لانچ کرنے میں آسانی فراہم کرتا ہے، جب کہ اس کی کارکردگی روایتی لڑاکا طیاروں کے برابر قرار دی جا رہی ہے۔

شِیلڈ اے آئی کے مطابق ایکس بَیٹ کی پہلی آزمائشی پرواز اگلے سال متوقع ہے، جب کہ اس کی باقاعدہ پیداوار 2029 میں شروع کی جائے گی۔

اگرچہ کمپنی نے ڈرون کی قیمت ظاہر نہیں کی، تاہم دفاعی ماہرین کا کہنا ہے کہ یہ روایتی پائلٹ والے جنگی طیاروں کے مقابلے میں نمایاں طور پر کم لاگت کا حامل ہوگا۔