ڈیرہ اسماعیل خان میں سیکیورٹی فورسز کا کامیاب آپریشن ، 7 خوارج جہنم واصل، ایک جوان شہید

راولپنڈی: سیکیورٹی فورسز نےخیبر پختونخوا کے ضلع ڈیرہ اسماعیل خان میں کامیاب آپریشن کرتے ہوئے بھارتی حمایت یافتہ 7 خوارجیوں کو جہنم واصل کر دیا ،جبکہ فائرنگ کے تبادلے میں ایک سپاہی نے جام شہادت نوش کیا۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نےڈیرہ اسماعیل خان کے علاقے کلاچی میں انڈین پراکسی فتنہ الخوارج کی موجودگی کی اطلاع پر کارروائی کی۔

ترجمان کے مطابق آپریشن کے دوران خوارج کے ٹھکانوں کو مؤثر طریقے سے نشانہ بنایا گیا جس کےنتیجے میں 7 خوارج ہلاک ہو گئےجب کہ فائرنگ کے تبادلے میں وطن کے بہادر سپوت نائیک یاسر خان جام شہادت نوش کرگئے، شہید کا تعلق ضلع مردان سے ہے۔

آئی ایس پی آر نے بتایا کہ مارے گئے خوارج سے اسلحہ اور گولہ بارود برآمد ہوا، ہلاک ہونے والے خوارج علاقے میں دہشت گردی کی متعدد کارروائیوں میں ملوث تھے۔

ترجمان پاک فوج کا کہنا تھا کہ علاقے میں مزید ممکنہ دہشت گردوں کے خاتمے کیلئے سینی ٹائزیشن آپریشن جاری ہے، ملک سے غیرملکی حمایت یافتہ دہشت گردی کا مکمل خاتمہ کیا جائے گا۔

آئی ایس پی آر کے مطابق سیکیورٹی فورسز بھارتی سپانسرڈ دہشت گردی کا مکمل خاتمہ کرنے کے لیے پرعزم ہیں، بہادر جوانوں کی قربانیاں ہمارے اِس عزم کو مزید مضبوط کرتی ہیں۔