وزیراعلیٰ سہیل آفریدی نے شہدا کے ورثا کی امدادی رقم 50 لاکھ سے بڑھاکر ایک کروڑ کردی

پشاور: وزیراعلیٰ خیبر پختونخوا سہیل آفریدی نے شہداء کے ورثا کیلئے امدادی رقم 50 لاکھ روپے بڑھا کر ایک کروڑ کرنے کا اعلان کر دیا۔

تفصیلات کے مطابق وزیراعلیٰ خیبر پختونخوا سے پاک بھارت جنگ کے دوران شہید ہونے والے فورسز اہلکاروں کے ورثا نے ملاقات کی۔

ملاقات میں وزیراعلیٰ نے شہدا کے ورثا کے لیے امدادی رقم 50 لاکھ سے بڑھا کر ایک کروڑ جبکہ زخمی اہلکاروں کے لیے امدادی رقم 10 سے بڑھا کر 25 لاکھ روپے کرنے کا اعلان کیا۔

اس موقع پر سہیل آفریدی کا کہنا تھا کہ خیبر پختونخوا حکومت شہدا کے اہل خانہ کے شانہ بشانہ کھڑی ہے، شہداء ہمارا فخر ہیں، حکومت ان کے ورثا کا خیال رکھےگی۔ خیبر پختونخوا کے عوام کی قربانیاں ملک و قوم کی سلامتی کی ضمانت ہیں۔