پاکستان یمن کے مسئلے کی بات چیت اور سفارتکاری کے ذریعے حل کی حمایت کرتا ہے ،دفتر خارجہ

اسلام آباد: دفترخارجہ نے کہا ہے پاکستان یمن کے بحران کے حل کے لیے مذاکرات اور سفارت کاری کے ذریعے پرامن راستہ اختیار کرنے کی حمایت کرتا ہے اور خطے میں دیرپا امن و استحکام کے لیے شراکت داری، اخوت اور اتحاد کی اقدار کو مضبوط بنانے میں اپنا مثبت کردار ادا کرنے کے لیے ہر وقت تیار ہے۔

تفصیلات کے مطابق ترجمان دفترخارجہ طاہر اندرابی نےیمن کی صورتحال سے متعلق میڈیا سوالات کے جواب میں کہا ہے کہ پاکستان یمن کے بحران کے حل کے لیے مذاکرات اور سفارت کاری کے ذریعے پرامن راستہ اختیار کرنے کی حمایت کرتا ہے۔

ترجمان دفتر خارجہ نےمزید کہا کہ پاکستان یمن کی علاقائی سالمیت کے لیے اپنے عزم کا اعادہ کرتا ہے ۔ پاکستان امید کرتا ہے کہ سعودی عرب اور متحدہ عرب امارات کی جانب سے لیے گئے مثبت اقدام مسئلے کے پرامن حل میں کردار ادا کریں گے۔

دفترخارجہ کے ترجمان  کے مطابق پاکستان سعودی عرب اور متحدہ عرب امارات کی قیادت کی جانب سے یمن کی صورت حال سے نمٹنے کے لیے دانش مندی اور دوراندیشی کو قدر کی نگاہ سے دیکھتا ہے۔

ترجمان دفتر خارجہ نے کہا کہ دونوں ملکوں کی کاوشیں علاقائی امن و استحکام کے فروغ کی خواہش کا اظہار کرتی ہیں ۔پاکستان خطے میں پائیدار امن و استحکام اور بھائی چارے کے فروغ کے لیے مثبت کردار ادا کرنے کے لیے تیار ہے ۔