شہریوں کے لیے اچھی خبر ،صوبائی حکومت نے ایک ساتھ 5 چھٹیوں کا اعلان کر دیا

لاہور:صوبائی دارالحکومت لاہور کے شہریوں کیلئے اچھی خبر سامنے آئی ہے،پنجاب حکومت نے 4 فروری سے 8 فروری تک 5 روزہ خصوصی تعطیلات کا اعلان کر دیا۔

اس حوالے سے صوبائی حکومت کی جانب سے نوٹیفکیشن جاری کر دیا گیا ہے۔

جاری کر دہ نوٹیفکیشن کے مطابق ان تعطیلات میں قومی و مذہبی ایام کے ساتھ ساتھ شہر کا روایتی اور ثقافتی تہوار بسنت بھی شامل کیا گیا ہے، جس سے شہریوں کو طویل وقفہ میسر آئے گا۔

جاری کردہ اعلامیے کے مطابق تعطیلات کا آغاز 4 فروری کو شبِ برات سے ہوگا، جبکہ 5 فروری کو یومِ کشمیر کے موقع پر قومی تعطیل منائی جائے گی،اس کے بعد 6، 7 اور 8 فروری کو بسنت کی تقریبات منعقد کی جائیں گی، جس کے نتیجے میں لاہور کے شہریوں کو مسلسل 5 دن کی چھٹیاں ملیں گی۔

جاری کر دہ نوٹیفکیشن کے مطابق ان تعطیلات کے دوران سرکاری دفاتر، اسکولز اور کالجز بند رہیں گے تاکہ شہری بسنت کی تقریبات سے بھرپور لطف اندوز ہو سکیں اور اہلِ خانہ کے ساتھ وقت گزار سکیں۔

دوسری جانب طویل تعطیلات کے اعلان پر شہریوں کی جانب سے خوشی کا اظہار کیا جا رہا ہے،حکام نے بسنت کے دوران خصوصی طور پر پتنگ بازی سے متعلق حفاظتی اقدامات پر زور دیا ہے، کیونکہ ماضی میں ہجوم اور حادثات کے خدشات سامنے آتے رہے ہیں۔

 شہری انتظامیہ کے مطابق قانون نافذ کرنے والے ادارے، ریسکیو ٹیمیں اور ضلعی انتظامیہ الرٹ رہیں گی تاکہ کسی بھی ناخوشگوار واقعے سے بچا جا سکے۔