سندھ میں مکمل لاک ڈاؤن نہیں ہے : وزیر اعلیٰ مراد علی شاہ

تفصیلات کے مطابق وزیر اعلیٰ سندھ مراد علی شاہ نے کراچی میں میڈیا سے گفتگو کرتے ہوئے کہا ہے کہ ہم نے ٹاسک فورس کی میٹنگ کے بعد اسد عمر اور ڈاکٹر فیصل سلطان سے بات کی،کچھ لوگوں کا خیال تھا کہ مکمل لاک ٖڈآؤن کیا جائے، لیکن ہم مکمل لاک ڈاؤن نہیں کر رہے۔ کچھ چیزیں بند ہونگی اور کچھ کھلی رہیں گی۔

انہوں نے کہا کہ کورونا کی تیسری لہر میں شمالی علاقوں میں کافی نقصان ہوا تھا، تیسری لہر کے دوران لاہور میں کورونا کی شدت ذیادہ ہونے پر کافی سختی کی گئی تھی۔اب کی بار ڈیلٹا ویرینٹ کے پھیلاؤ کی شرح بہت ذیادہ ہے،پچھلے تین دن سے ڈھائی ہزار سے اوپر کیسز رپورٹ ہو رہے ہیں۔

لاک ڈاؤن کے دوران صوبے کی تمام مارکیٹیں بند رہیں گی، جب کہ ایکسپورٹ انڈسٹری اور صوبے کے تمام میڈیکل اسٹورز اور پٹرول پمپ کھلے رہیں گے۔ کریانہ، ملک شاپ ، بیکری اور گوشت کی دکانیں شام 6 بجے تک کھولنے کی اجازت ہو گی جبکہ ریٹیل کا کاروبار مکمل بند رہے گا ۔

مراد علی شاہ نے کہا کہ یہ مکمل لاک ڈاؤن نہیں ہے، بڑی ٹرانسپورٹ بند کررہے ہیں اورچھوٹی ٹرانسپورٹ ویکسی نیشن کے لیے کھلی رہے گی۔ اگلے 9 دن کے لیے تقریباً سرکاری ادارے بھی بند کردیئے ہیں۔ وزیر اعلی نے کہا کہ کابینہ میٹنگ سمیت امتحانات بھی ایک ہفتے کے لیے ملتوی کیے جارہے ہیں۔ میں نے آج تک جو بھی فیصلے کیے ڈاکٹرز سے مشاورت سے کیے۔

خیال رہے کراچی میں نئی پابندیوں کےساتھ کل سے 8 اگست تک 9 دن کا لاک ڈاؤن ہوگا،جبکہ کراچی میں شرح 22.6 فیصد رہی، حیدرآباد میں کورونا مثبت کیسوں کی شرح 9 فیصد اور سندھ بھر میں مجموعی طور پر شرح 13.4 فیصد ریکارڈ کی گئی۔