اسرائیل کے بن گوریان ایئرپورٹ پر میزائل حملہ،ایرانی حملوں میں مجموعی طور پر 11 افراد ہلاک

تل ابیب:اسرائیلی میڈیا نے دعویٰ کیا ہے کہ ایران کی جانب سے داغے گئے میزائلوں نے اسرائیل کے مرکزی ہوائی اڈے بن گوریان ایئرپورٹ کو نشانہ بنایا ہے تاہم اسرائیلی فوج کی جانب سے اس حوالے سے تاحال کوئی باضابطہ بیان سامنے نہیں آیا۔

صہیونی میڈیا رپورٹس کے مطابق جمعے کی صبح ایران کی جانب سے میزائل داغے جانے کے بعد تل ابیب اور اسرائیل کے دیگر علاقوں میں زور دار دھماکوں کی آوازیں سنی گئیں جب کہ اسرائیلی فضائی دفاعی نظام ان میزائلوں کو فضا میں روکنے کی کوشش کر رہے تھے۔

اسرائیلی فوج نے ایک بیان میں کہا کہ اس نے ایران سے اسرائیل کی جانب داغے گئے میزائلوں کی نشاندہی کی اور خطرے سے نمٹنے کے لیے فضائی دفاعی نظام متحرک کر دیے ہیں۔

میڈیا رپورٹس میں مزید بتایا گیا ہے کہ وسطی اسرائیل میں ایرانی میزائلوں کو فضا میں تباہ کرنے کے دوران زمین پر گرنے والے ملبے سے ایک شخص زخمی ہوگیا۔

زخمی ہونے والا شخص میزائل کو فضا میں تباہ کرنے کے عمل کے دوران گرنے والے شریپنل (دھاتی ٹکڑوں) کی زد میں آیا جب کہ ایران کے ساتھ جاری جنگ کے آغاز سے اب تک اسرائیل میں سینکڑوں افراد متاثر ہوئے ہیں،جبکہ اسرائیل نے ایران کے 6 بیلسٹک میزائل لانچرز اور 3 ایڈوانس ڈیفنس سسٹمز تباہ کرنے کا دعویٰ کیا ہے

اسرائیلی وزارتِ صحت کا کہنا ہے کہ ایران کے ساتھ ہفتے کے روز شروع ہونے والی جنگ کے بعد سے اب تک اسرائیل کے مختلف اسپتالوں میں ایک ہزار 600 سے زائد افراد کا علاج کیا جا چکا ہے،جبکہ اس دوران مختلف حملوں اور متعلقہ واقعات میں اب تک کم از کم 11 افراد ہلاک بھی ہو چکے ہیں۔

 دوسری جانب پاسدارانِ انقلاب نے کہا ہے کہ جمعے کو تل ابیب کی جانب خیبر میزائل داغے گئے، جو آپریشن ”وعدہ صادق 4“ کی اکیسویں لہر کا حصہ ہیں۔

پاسدارانِ انقلاب کی جانب سے مزید کہا گیا کہ حملوں کی نئی لہر کا آغاز میزائل اور ڈرونز کے مشترکہ آپریشن سے کیا گیا، جس میں تل ابیب کے قلب میں واقع مقامات کو نشانہ بنایا گیا۔