سندھ کی عوام کو ایک متبادل دیا جائے گا وہ بھی تبدیلی چاہتے ہیں : شاہ محمود قریشی

تفصیلات کے مطابق شاہ محمود قریشی کا ملتان میں میڈیا سے گفتگو کرتے ہوئے کہنا تھا کہ  سیالکوٹ میں مسلم لیگ ن کی نشست پر تحریک انصاف جیتی ہے ۔

انہوں نے کہا کہ صوبہ سندھ کے حوالے سے ایک اہم میٹنگ وزیر اعظم کی سربراہی میں ہوئی ہے ،تحریک انصاف سندھ کی عوام سے رجوع کرے گی ، سندھ کی عوام کو ایک متبادل دیا جائے گا وہ بھی تبدیلی چاہتے ہیں ،سندھ کی عوام جب قائل ہوگی تو وہاں بھی تبدیلی ہوگی ۔

شاہ محمود قریشی کا کہنا تھا کہ جنوبی پنجاب سیکرٹریٹ پر کام شروع ہونے جارہا ہے ، جنوبی پنجاب سیکرٹریٹ ملتان اور بہاولپور میں بنے گا ، جو پیسہ جنوبی پنجاب کے لیے رکھا گیا ہے اس کی ایک ایک پائی یہاں لگ جائے تاکہ لوگوں کو خوشی ملے ۔

انہوں نے کہا ہے کہ جنوبی پنجاب سکرٹریٹ کا کام شروع ہو گیا ہے وہاں جھنڈیاں بھی لگا دی ہیں ۔جنوبی پنجاب سکرٹریٹ کا کام بروز سوموار کو ٹھکیدار موقع پر کام شروع کر دے گا،بہاولپور میں بھی سکرٹریٹ کے لیے تیس ایکڑ زمین خرید لی گئی ہے۔

ان کا مزید کہنا تھا کہ ملتان شہر میں سالڈ ویسٹ مینجمنٹ نے عید پر اچھا کام کیا ، واسا کے بہت سے مسائل ہیں جو توجہ طلب ہیں ۔