مشرقِ وسطیٰ میں کشیدگی :پنجاب کے تعلیمی اداروں میں 15 اپریل تک چھٹیوں کی سفارش

لاہور: مشرق وسطیٰ میں جاری کشیدگی کے باعث پنجاب میں جاری توانائی بحران کے پیشِ نظر صوبائی حکومت کو تعلیمی اداروں میں تعطیلات میں توسیع کی سفارش کی گئی ہے۔

ذرائع کے مطابق محکمہ توانائی پنجاب نے نئی تجاویز ارسال کی ہیں جن میں 15 اپریل تک تعلیمی اداروں میں چھٹیاں دینے اور سکولوں میں ہائبرڈ نظامِ تعلیم اپنانے کی سفارش شامل ہے۔

ذرائع نے مزید بتایا کہ اس کے علاوہ فیول راشننگ کے نفاذ، پیٹرول اور ڈیزل کی منصفانہ تقسیم کے لیے کوپن یا ڈیجیٹل سسٹم، اور مخصوص دنوں میں محدود گاڑیوں کو ایندھن فراہم کرنے کی تجاویز بھی دی گئی ہیں۔

ذرائع کے مطابق اسی طرح نجی اداروں کے لیے ورک فرام ہوم کے سخت احکامات اور غیر ضروری تقریبات پر مکمل پابندی کی سفارش بھی شامل ہے۔

مزید کہا گیا کہ میٹرو اور بس سروس میں اضافہ کیا جائے، جبکہ ایل ای ڈی بل بورڈز اور آرائشی لائٹس بند کرنے اور رات 10 بجے کے بعد اسٹریٹ لائٹس کو متبادل موڈ پر چلانے کی تجاویز بھی دی گئی ہیں۔

خیال رہے کہ یہ اقدامات صوبے میں توانائی کے بحران سے نمٹنے اور وسائل کے مؤثر استعمال کے لیے کیے جا رہے ہیں، اور عوام اور کاروباری سرگرمیوں پر کم سے کم اثر ڈالنا ان کا مقصد ہے۔