بال ٹیمپرنگ کا معاملہ: فخر زمان پر پی ایس ایل کے 2 میچز کی پابندی عائد

لاہور:بال ٹیمپرنگ کے معاملے پر قومی کرکٹر فخر زمان کے خلاف ایکشن لیتے ہوئے انہیں دو میچوں کے لیے معطل کر دیا گیا ہے۔

ذرائع کے مطابق یہ واقعہ کراچی اور لاہور کے درمیان ہونے والے میچ کے دوران پیش آیا، جہاں فخر زمان پر گیند کے ساتھ مبینہ چھیڑ چھاڑ کا الزام عائد کیا گیا۔ اس کے بعد انہیں لیول 3 کی خلاف ورزی کے تحت چارج کیا گیا۔

پاکستان کرکٹ بورڈ (پی سی بی) کا کہنا ہے کہ فخر زمان کو لیول 3 جرم کا مرتکب قرار دیا گیا ہے، جس کے باعث وہ ملتان سلطانز اور اسلام آباد یونائیٹڈ کے خلاف میچز میں شرکت نہیں کر سکیں گے،میچ آفیشلز نے ضابطہ اخلاق کے تحت کارروائی کرتے ہوئے ان پر دو میچوں کی پابندی عائد کی۔

خیال رہے کہ کرکٹ قوانین کے مطابق کھلاڑی صرف گیند کو چمکانے کے لیے اسے ہاتھ لگا سکتے ہیں، جبکہ اس کی حالت میں کسی بھی قسم کی تبدیلی قانون 41.3.2 کے تحت جرم شمار ہوتی ہے۔

دوسری جانب فخر زمان نے سماعت کے دوران دو مرتبہ اپنے اوپر لگائے گئے الزامات کو مسترد کیا،رپورٹس کے مطابق اس واقعے کے باعث لاہور قلندرز پر میچ کے دوران ہی 5 رنز کی پنالٹی بھی عائد کی گئی تھی۔

واضح رہے کہ 35 سالہ فخر زمان اب تک 215 میچز میں پاکستان کی نمائندگی کر چکے ہیں۔