وزیر اعظم سے فیلڈ مارشل کی ملاقات،ایران و امریکا ثالثی کے حوالے سے تبادلہ خیال 

اسلام آباد:وزیراعظم محمد شہباز شریف سے فیلڈ مارشل سید عاصم منیر نے اسلام آباد میں ملاقات کی ، جس میں دونوں رہنماؤں نے کشیدگی میں اب تک کمی پر اطمینان کا اظہار کیا۔

تفصیلات کے مطابق آرمی چیف، چیف آف ڈیفنس فورسز، فیلڈ مارشل سید عاصم منیر نے وزیراعظم شہباز شریف سے وزیراعظم ہاؤس میں ملاقات کی،جس کے دوران خطے میں پائیدار امن کے حصول کیلئے پاکستان کی ثالثی کی کوششوں میں ہونے والی پیش رفت کا جائزہ لیا گیا۔

ملاقات میں وزیراعظم اور چیف آف ڈیفنس فورسز نے کشیدگی میں کمی پر اطمینان کا اظہار کرتے ہوئے اس بات پر زور دیا کہ تمام فریقین امن اور جنگ بندی کو برقرار رکھیں۔

دونوں رہنماؤں نے تمام اطراف کےتحمل اور بردباری کو سراہتے ہوئے اس عزم کا اعادہ کیا کہ پاکستان مذاکرات کے ذریعے قابلِ قبول حل تک پہنچنے میں دونوں ملکوں کو ہر ممکن تعاون فراہم کرنے کے لیے پُرعزم ہے۔

وزیراعظم شہباز شریف نے پاکستان آنے والے وفود کو دعوت کی تجدید کی اور کہا کہ پاکستان کی جانب سے مکمل تعاون اور اعلیٰ ترین میزبانی فراہم کی جائے گی۔