پاکستان اور چین کے اداروں کے درمیان دو مفاہمتی یادداشتوں اور معاہدے پر دستخط

سانیا :صدر مملکت آصف علی زرداری نے چین کے صوبہ ہینان کے شہر سانیا میں پاکستان اور چین کے اداروں کے درمیان مشترکہ منصوبے کے تحت دو مفاہمتی یادداشتوں اور معاہدے پر دستخط کی تقریب میں شرکت کی۔

تفصیلات کے مطابق سمجھوتے تعمیراتی مشینری، صحت حیوانات اور میڈیکل ٹیکنالوجی سے متعلق تھے جن کا مقصدان اہم شعبوں میں عملی تعاون کو فروغ دینا ہے۔اعلیٰ معیار کے آلات کی تیاری اور تعمیراتی مشینری کے شعبوں میں تعاون کے لیے الحسن ٹریڈ اسٹیبلشمنٹ، سینی انٹرنیشنل ڈیولپمنٹ اور ہینان جیالونگ انٹرنیشنل ٹیکنالوجی کے درمیان مفاہمتی یادداشت پر دستخط کیے گئے۔

 یہ سہ فریقی تعاون چین پاکستان اقتصادی راہداری سے متعلق کاموں کی معاونت، تعمیراتی مشینری اور آلات کی فراہمی میں تعاون کے فروغ، پیشہ ورانہ تربیتی نظام کی ترقی اور فروخت کے بعد آپریشن و دیکھ بھال کی خدمات کی فراہمی پر مرکوز ہے۔

فریقین پاکستان میں فیکٹریوں کے قیام اور تعمیراتی مشینری کی مقامی پیداوار کے فروغ کے لیے سرمایہ کاری کے مواقع کا بھی جائزہ لیں گے۔ اس مفاہمتی یادداشت پر سینیٹر سلیم مانڈوی والا، سینی گروپ کے نائب صدر لی چن اور ہینان جیالونگ انٹرنیشنل ٹریڈ کمپنی کے چیئرمین ہاؤ جیالونگ نے دستخط کیے۔

محکمہ لائیو اسٹاک و فشریز، حکومتِ سندھ اورچین کے لوئیانگ ماڈرن بایولوجی گروپ کے درمیان پاکستان میں حیوانات کیلئے ویکسینز، بشمول منہ کھر کی بیماری کی ویکسین کی فراہمی کے لیے ایک مشترکہ منصوبے کا معاہدہ طے پایا۔

اس معاہدے میں ٹیکنالوجی کے تبادلے اور پاکستان میں جانوروں کے لیے ٹریک اور ٹریس ایبلٹی سسٹمز کے نفاذ پر مستقبل کے تعاون کی بھی شق شامل ہے۔ اس معاہدے پر سینئر صوبائی وزیر سندھ شرجیل انعام میمن اور لوئیانگ ماڈرن بایولوجی گروپ کے چیئرمین وانگ شانپو نے دستخط کیے۔

ڈاکٹر ضیاءالدین ہسپتال اور شینزن وی بانگ ٹیکنالوجی کے درمیان میڈیکل ٹیکنالوجی کے شعبے میں مفاہمتی یادداشت پر دستخط ہوئے جس کامقصد کلینیکل میڈیسن میں طبی ذہین روبوٹس کے جدید استعمال کو فروغ دینا ہے۔ اس مفاہمتی یادداشت پر ڈاکٹر ضیاءالدین ہسپتال کے ڈاکٹر انوپ کمار داوانی اور شینزن وی بانگ ٹیکنالوجی کے ڈپٹی جنرل منیجر مسٹر ڈینگ ہائی تاؤ نے دستخط کیے۔

اس موقع پر پاکستان اور چین کے درمیان 75 سالہ دوستی پر مبنی ایک مختصر دستاویزی فلم بھی دکھائی گئی۔وزیراعلیٰ سندھ کے معاونِ خصوصی سید قاسم نوید قمر،چیف سیکریٹری سندھ علی حسن بروہی اور چین میں پاکستان کے سفیر خلیل ہاشمی بھی تقریب میں موجود تھے۔