پاکستان سمیت دنیا بھر میں آج محنت کش مزدوروں کا عالمی دن منایا جا رہا ہے

اسلام آباد: پاکستان سمیت دنیا بھر میں ہر سال یکم مئی کو یومِ مزدور اس عزم کے ساتھ منایا جاتا ہے کہ محنت کشوں کے معاشی حالات بہتر بنانے کے لیے کوششوں کو تیز کیا جائے۔

 اس دن کو منانے کا بنیادی مقصد مزدوروں کی محنت اور لگن کو تسلیم کرنا، ان کے حقوق کے بارے میں آگاہی پیدا کرنا اور انہیں استحصال سے بچانے کے لیے اقدامات کو فروغ دینا ہے۔

1886ء میں یکم مئی کے روز امریکہ کے شہر شکاگو میں مزدور سرمایہ داروں اور صنعتکاروں کے استحصال کے خلاف سڑکوں پر نکلے۔ اس تحریک کے دوران پیش آنے والے واقعات، جنہیں ہائے مارکیٹ افیئرکہا جاتا ہے، میں متعدد مزدور ہلاک اور زخمی ہوئے جبکہ مزدور رہنماؤں کو بھی سزائیں دی گئیں۔

شکاگو کے محنت کشوں کے ساتھ اظہارِ یکجہتی کے طور پر دنیا کے بیشتر ممالک میں یکم مئی کو مزدوروں کے عالمی دن کے طور پر منایا جاتا ہے۔

پاکستان میں قومی سطح پر یوم مزدور منانے کا آغاز 1973 میں ذوالفقار علی بھٹو کے دور حکومت میں ہوا، اس دن کی مناسبت سے ملک بھر کے تمام چھوٹے بڑے شہروں میں تقریبات، سیمینارز، کانفرنسز اور ریلیوں کا انعقاد کیا جاتا ہے۔