'معرکۂ حق' کی فتح کو ایک سال، گنڈا سنگھ بارڈر پرجذبہ انگیز تقریب

قصور: معرکہ حق اور آپریشن بیان المرصوص میں فتح کا ایک سال مکمل ہونے پرگنڈا سنگھ بارڈر قصور میں شاندار تقریب کا انعقاد کیا گیا۔

تقریب میں پاکستان رینجرز (پنجاب) کی دلکش پریڈ نے شرکاء کا لہو گرما دیا اور جذبۂ حب الوطنی ابھارا۔

تقریب کے دوران گورنمنٹ کالج یونیورسٹی (لاہور) کے طلبا اور نوجوان گلوکار اے آر ناصر نے خصوصی نغمے پیش کرکے ملک اور افواج سے اظہارِ عقیدت کیا۔

قومی جذبے سے سرشار ہزاروں شہری مختلف گروپوں کی شکل میں گنڈا سنگھ بارڈر پہنچے۔ تقریب میں طلبہ،اساتذہ، وکلاء،پولیس،سول  ملازمین اورعام شہریوں نےبڑی تعداد میں شرکت کی

تقریب میں شریک  افراد سبزہلالی پاکستانی پرچم تھامے ملک اور پاک فوج کے حق میں نعرے لگاتے رہے۔ واہگہ پریڈ گراؤنڈ سے عوام نے بھارتیوں کو 0-8 کا سکور کارڈ دکھا کر بھارت کو اسکی عبرتناک شکست یاد بھی دلا دی۔

تقریب میں  شریک افراد کا کہنا تھا کہ بھارت کے خلاف معرکہ حق میں پاکستان کی کامیابی کو تمام دنیا ہمیشہ یاد رکھے گی۔ اس موقع پر عوام کا کہنا تھا کہ اگر بھارت نے دوبارہ کسی مہم جوئی کی ہمت کی تو پہلے سے زیادہ منہ توڑ جواب دیں گے۔

پاکستان کو کمزور سمجھنا بھارت اور مودی کی بہت بڑی بھول ہے، 26 کروڑ عوام پاک فوج کے شانہ بشانہ موجود ہے۔

 ایک شہری کا کہنا تھا کہ ہمیں افواج  پاکستان اوراس کی قیادت پر فخر ہے جن کی بدولت ہمیں دنیا میں عزت ملی۔

شرکاء کا کہنا تھا کہ ہماری عسکری قیادت کے دنیا گن گارہی ہے اورآج پاکستان کواقوام عالم میں اہم مقام حاصل ہے۔ شرکاء نے گنڈا سنگھ بارڈر پر لہو گرما دینے والی تقریب دیکھی اورپنجاب رینجرز کے جوانوں کی حوصلہ افزائی کی 

معرکہ حق کا ایک سال مکمل ہونے پرقوم کاتروتازہ جوش وجذبہ مسلح افواج اورعوام کے شانہ بشانہ ہونے کی عکاسی کرتا ہے۔