آسٹریلیا کے خلاف ون ڈے سیریز کیلئے پی سی بی نے میچ آفیشلز کا اعلان کر دیا

لاہور:پاکستان کرکٹ بورڈ (پی سی بی)نے آسٹریلیا کے خلاف کھیلی جانے والی 3 ون ڈے انٹرنیشنل میچوں کی سیریز کے لیے میچ آفیشلز کا اعلان کر دیا۔
پی سی بی کی جانب سے جاری اعلامیے کے مطابق پاکستان اور آسٹریلیا کے درمیان ون ڈے انٹرنیشنل سیریز 30 مئی سے 4 جون تک راولپنڈی اور لاہور میں کھیلی جائے گی۔

اعلامیے کے مطابق سری لنکا کے گریم لا بروئے تینوں ون ڈے انٹرنیشنل میچز میں میچ ریفری کے فرائض انجام دیں گے۔اسی طرح آئی سی سی ایلیٹ پینل کے احسن رضا، رچرڈ کیٹلبرو اور کمار دھرماسینا سیریز میں آن فیلڈ امپائرنگ کے فرائض سر انجام دیں گے۔

جبکہ30 مئی کو راولپنڈی میں کھیلے جانے والے پہلے ون ڈے میں کمار دھرماسینا کے ساتھ آصف یعقوب آن فیلڈ امپائر ہوں گے، جبکہ آصف یعقوب آئی سی سی ایمرجنگ امپائرز پینل کا حصہ ہیں۔

اسی طرح 2 جون کو لاہور کے قذافی اسٹیڈیم میں ہونے والے دوسرے ون ڈے میں فیصل خان آفریدی اور رچرڈ کیٹلبرو امپائرنگ کے فرائض انجام دیں گے، فیصل خان آفریدی آئی سی سی انٹرنیشنل پینل آف امپائرز کے رکن ہیں۔

اعلامیے کے مطابق سیریز کا تیسرا اور آخری ون ڈے 4 جون کو لاہور میں کھیلا جائے گا، جس میں احسن رضا اور کمار دھرماسینا آن فیلڈ امپائر ہوں گے جبکہ ناصر حسین فورتھ امپائر کے طور پر ذمہ داریاں نبھائیں گے۔