سابق کپتان کیویز کپتان باز کین ولیمسن نے ریٹائرمنٹ کا اعلان کر دیا

کرائسٹ چرچ:نیوزی لینڈ کے سابق کپتان اور مایہ ناز بلے باز کین ولیمسن نے انٹرنیشنل کرکٹ سے ریٹائرمنٹ کا اعلان کر دیا۔اس کے ساتھ ہی عالمی کرکٹ کے ایک سنہرے باب کا اختتام ہو گیا، ماہرین کرکٹ اور سابق کھلاڑی انہیں نیوزی لینڈ کی تاریخ کے عظیم ترین بلے بازوں میں شمار کرتے ہیں۔

غیر ملکی میڈیا رپورٹس کے مطابق اپنی ریٹائرمنٹ کے حوالے سے ولیمسن کا کہنا ہے کہ میں کافی عرصے سے سوچ رہا تھا مگر گزشتہ چند دنوں میں سب واضح ہوا کہ یہ ریٹائرمنٹ کا مناسب وقت ہے، نیوزی لینڈ کے لیے جتنا بھی کھیلا میں نے اپنا سب کچھ دیا اس پر میں فخر محسوس کررہا ہوں۔

کیویز بلے باز کین ولیمسن نے 2010 میں بین الاقوامی کرکٹ میں قدم رکھا اور جلد ہی اپنی شاندار بیٹنگ، پرسکون مزاج اور قائدانہ صلاحیتوں کے باعث دنیا بھر میں پہچان حاصل کر لی۔ وہ 2010 اور 2020 کی دہائی کے معروف فیب فور بلے بازوں میں شامل رہے،جن میں ویرات کوہلی، اسٹیو اسمتھ اور جو روٹ بھی شامل ہیں۔

انہوں نے اپنے ٹیسٹ کیریئر کا آغاز بھارت کے خلاف سنچری سے کیا اور کم عمری میں نیوزی لینڈ کے تیز ترین 3000 ٹیسٹ رنز مکمل کرنے والے بلے باز بن گئے، کین ولیمسن نے اپنے بین الاقوامی کیریئر میں 19 ہزار 346 رنز اسکور کیے، جن میں 48 سنچریاں شامل ہیں۔

2019 کے ون ڈے ورلڈ کپ میں ولیمسن نے غیرمعمولی کارکردگی کا مظاہرہ کرتے ہوئے پلیئر آف دی ٹورنامنٹ کا اعزاز حاصل کیا اور نیوزی لینڈ کو مسلسل دوسری بار فائنل تک پہنچایا، اگرچہ فائنل میں انگلینڈ کے خلاف شکست ہوئی تاہم ان کے طرز عمل اور کھیل کے جذبے کو دنیا بھر میں سراہا گیا۔

علاوہ ازاں ان کی قیادت میں نیوزی لینڈ نے 2021 میں پہلی مرتبہ آئی سی سی ورلڈ ٹیسٹ چیمپئن شپ جیت کر تاریخ رقم کی، اسی سال کیوی ٹیم ٹی ٹوئنٹی ورلڈ کپ کے فائنل تک بھی پہنچی۔

ولیمسن نے اپنےکیریئرمیں 110 ٹیسٹ، 175 ون ڈے اور 93 ٹی ٹوئنٹی انٹرنیشنل میچز میں نیوزی لینڈ کی نمائندگی کی۔انہوں نےتینوں فارمیٹس میں مجموعی طور پر 19 ہزار 346 رنز اسکور کیے،اورانکا نیوزی لینڈ کرکٹ کے عظیم ترین بلے بازوں میں شمار کیا جاتا ہے۔

کین ولیمسن کو نہ صرف ایک عظیم بلے باز بلکہ ایک مثالی کپتان، بہترین فیلڈر اور کھیل کے حقیقی سفیر کے طور پر یاد رکھا جائے گا، ان کی ریٹائرمنٹ عالمی کرکٹ کے ایک یادگار دور کے خاتمے کے مترادف ہے۔