ایران،امریکا امن معاہدہ 24 گھنٹوں میں حتمی شکل اختیار کرلے گا،وزیراعظم

اسلام آباد:وزیراعظم شہباز شریف وزیراعظم نے امید ظاہر کرتے ہوئے کہا ہے کہ ایران اور امریکا کے درمیان مجوزہ امن معاہدہ آئندہ چوبیس گھنٹوں کے اندر حتمی شکل اختیار کر لے گا اور معاہدے کے تمام تر اہم نکات اگلے چوبیس گھنٹے میں فائنل ہو جائیں گے۔

سوشل میڈیا پلیٹ فارم ایکس پرجاری کر دہ بیان میں وزیر اعظم شہباز شریف نے کہا کہ امریکا ایران مجوزہ امن معاہدہ آئندہ چوبیس گھنٹوں میں حتمی شکل اختیا ر کر لے گا۔ انہوںنے مزید کہا کہ پاکستان دونوں ممالک کے درمیان ہونے والے اس امن معاہدے پر الیکٹرانک دستخط کی تیاریاں کر رہا ہے جس کے بعد اگلے ہفتے تکنیکی سطح کے باقاعدہ مذاکرات کا آغاز کیا جائے گا۔

بیان میں وزیر اعظم نے اس اہم ترین سفارتی کامیابی پر بات کرتے ہوئے کہا کہ ہم مذاکرات کے دوران مسلسل جاری رہنے والی وابستگی اور سنجیدگی پر امریکا اور ایران دونوں کا شکریہ ادا کرنا چاہتے ہیں۔انہوں نے خطے کے دیگر ممالک کا بھی شکریہ ادا کیا جنہوں نے امن کی ان مخلصانہ کوششوں کے لیے اپنا مثبت کردار ادا کیا۔

بیان میں وزیراعظم نے اس یقین کا اظہار کیا کہ ایران اور امریکا کے درمیان ہونے والا یہ تاریخی امن معاہدہ خطے میں مستقل اور دیرپا امن کے قیام کے لیے ایک انتہائی مضبوط بنیاد ثابت ہوگا۔