پنجاب اسکلز ڈویلپمنٹ فنڈاور مائیگرنٹ ریسورس سینٹرپاکستان کے درمیان ایک مفاہمتی یادداشت پر دستخط

لاہور: پنجاب اسکلز ڈویلپمنٹ فنڈ(پی ایس ڈی ایف) اور مائیگرنٹ ریسورس سینٹر(ایم آر سی) پاکستان کے درمیان ایک مفاہمتی یادداشت پر دستخط کیے گئے ہیں جس کا مقصد وزیراعلیٰ پنجاب مریم نواز کے ہنرمند نوجوان پروگرام کے تحت "پرواز کارڈ" سے مستفید ہونے والے نوجوانوں کے لیے محفوظ،  اور قانونی بین الاقوامی ہجرت کو فروغ دینے کے لیے ایک مربوط نطام قائم کرنا ہے۔

معاہدے کے تحت ایم آر سی بیرونِ ملک جانے والے امیدواروں کو باہر روانگی سے قبل مشاورتی نشت، آگاہی ورکشاپس، اور انفرادی رہنمائی فراہم کرے گا، جس میں ہجرت کے حقوق، دستاویزی تقاضوں، ویزا پراسیس اور غیر قانونی ہجرت کے خطرات سے متعلق معلومات شامل ہوں گی۔

دوسری جانب پنجاب اسکلز ڈویلپمنٹ فنڈ بین الاقوامی روزگار کے مواقع کے لیے تربیت یافتہ امیدواروں کی نشاندہی اور انہیں متحرک کرے گا، جبکہ ضرورت کے مطابق بین الااقومی روانگی سے قبل مطلوبہ ٹریننگ اور سرٹیفکیشن تک رسائی بھی یقینی بنائے گا۔

یہ شراکت داری پاکستان کے ہجرتی نظام میں موجود ایک اہم خلا کو پُر کرنے کی کوشش ہے تاکہ بیرونِ ملک روزگار کے لیے جانے والے ہنر مند افراد نہ صرف تکنیکی مہارت سے آراستہ ہوں بلکہ محفوظ ہجرت کے طریقہ کار، قانونی تحفظات اور دستیاب معاونت سے بھی مکمل آگاہی رکھتے ہوں۔

پی ایس ڈی ایف کے چیف ایگزیکٹو آفیسر احمد خان نے کہا کہ "مائیگریشن گورننس اور کونسلنگ کو مہارتوں کے پروگراموں میں ضم کر کے ہم اس بات کو یقینی بنا رہے ہیں کہ اس پروگرام سے مستفید ہونے والے افراد اعتماد اور تحفظ کے ساتھ بین الاقوامی روزگار کے لیے جائیں۔

مائیگرنٹ ریسورس سینٹر کی سینئر کونسلر شازیہ رفیق نے کہا کہ یہ شراکت داری اس بات کی بہترین مثال ہے کہ حکومت، بین الاقوامی ادارے اور سول سوسائٹی مل کر کس طرح تارکینِ وطن کے تحفظ اور بااختیار بنانے کے لیے کام کر سکتے ہیں۔ انہوں نے کہا کہ مہارتوں کی تربیت کے ساتھ محفوظ ہجرت سے متعلق آگاہی کو شامل کرنا وقت کی اہم ضرورت ہے۔

پاکستان عالمی منڈیوں میں ہنر مند افرادی قوت کی بڑھتی ہوئی طلب کو پورا کر رہا ہے۔ اس تناظر میں پی ایس ڈی ایف اور ایم آر سی باہمی تعاون سے اس امر کو یقینی بنائیں گے کہ بیرونِ ملک جانے کے خواہشمند افراد کو نہ صرف مطلوبہ مہارتوں پر عبور حاصل پو بلکہ انہیں کامیاب بین الاقوامی محفوظ مستقبل کے لیے ضروری آگاہی اور معاونت بھی حاصل ہو۔

اس شراکت داری کا مقصد ہنر مند کارکنوں کے لیے پائیدار روزگار کے مواقع کو فروغ دینا اور وزیراعلیٰ پنجاب کے اس وژن کو آگے بڑھانا ہے جس کے تحت پنجاب کو عالمی معیار کی مسابقتی اور برآمدی صلاحیت رکھنے والی انسانی افرادی قوت کا نمایاں مرکز بنایا جا رہا ہے۔