لاہور: محمود بھٹی کے خلاف مذہبی و سماجی تنظیموں کااحتجاج، قانونی کارروائی کا مطالبہ

لاہور: نامور فیشن ڈیزائنر محمود بھٹی کے متنازع بیانات کے خلاف پریس کلب لاہور کے باہر مختلف مذہبی و سماجی تنظیموں کی جانب سے احتجاجی مظاہرہ کیا گیا۔ مظاہرین نے محمود بھٹی کے حالیہ سوشل میڈیا بیانات کو خواتین اور اسلامی اقدار کے خلاف قرار دیتے ہوئے شدید مذمت کی۔

احتجاج کے شرکاء نے بینرز اور پلے کارڈز اٹھا رکھے تھے جن پر محمود بھٹی کے خلاف نعرے درج تھے۔ مقررین نے خطاب کرتے ہوئے کہا کہ سوشل میڈیا پر نشر ہونے والے بعض بیانات میں نکاح، پردہ اور معاشرتی اقدار کے حوالے سے ایسے خیالات کا اظہار کیا گیا جن سے عوام میں شدید تشویش پائی جاتی ہے۔

مظاہرین کا کہنا تھا کہ بعض دینی حلقوں اور علماء نے بھی ان بیانات پر سخت ردعمل کا اظہار کیا ہے۔ مقررین نے مطالبہ کیا کہ متعلقہ ادارے اس معاملے کی مکمل تحقیقات کریں اور اگر کسی قانون کی خلاف ورزی ثابت ہوتی ہے تو قانون کے مطابق کارروائی عمل میں لائی جائے۔احتجاج کے شرکاء نے وفاقی تحقیقاتی ادارے (ایف آئی اے) سے مطالبہ کیا کہ جاری انکوائری کو جلد مکمل کیا جائے اور حقائق سامنے لائے جائیں۔

انہوں نے حکومت اور قانون نافذ کرنے والے اداروں سے بھی مطالبہ کیا کہ عوامی جذبات اور ملکی قوانین کو مدنظر رکھتے ہوئے مناسب قانونی اقدامات کیے جائیں۔

مظاہرین نے اس عزم کا اظہار کیا کہ وہ مذہبی اور معاشرتی اقدار کے تحفظ کے لیے اپنی آواز بلند کرتے رہیں گے اور اس حوالے سے پرامن احتجاج کا سلسلہ جاری رکھیں گے